Prensa di Paraguay a relata con Miss Aruba Helen Hernandez a reconoce Miss Paraguay riba caya di New York

ORANJESTAD (AAN): Un relato hopi elocuente a sali publica Diaranson mainta den e corant La Nacion na Paraguay,

cu a presenta e storia con nan Miss Universe Paraguay 2021, esta Nadia Ferreira a acudi na New York pa participa den e famoso NY Fashion Week.

   Nadia Ferreira tin un cara bunita, y el a genera diripiente hopi interes na Paraguay den asuntonan di certamen di beyeza.  Su cara ta uno cu bo no ta lubida asina facil.

   El a bay New York pa e evento di Fashion Week, y practica su forma di cana riba pasarela cu e famoso influencer di social media, esta Salvita di San Salvador.

   Durante su estadia na New York tambe, e reina di beyeza di Paraguay a keda haya atraccion.  Y pa casualidad ora e tabata canando riba caya, un peaton a mire y reconoce.  E peaton ey ta Miss Universe Aruba 2020, esta Helen Hernandez, kende a bise: “Reconoci esta cara tan bella, Miss Universo 2021 si Dios me lo permite.”

   Ademas di participa den New York Fashion Week, Nadia lo ta sigui traha pa mehora su pasarela cu ta hopi importante pa e certamen di Miss Universe.  Salvita ta experto den certamen di beyeza y pasarela.

   Salvita ta bisa riba su social media cu Nadia Ferreira ta divina, y cada rato ta pone potret di e Miss Paraguay awor cu e ta na New York, y hasta un video unda bo por mire ta train cana riba pasarela.

   Y te cu awor por mira cu Nadia Ferreira a train pasarela basta bon.

   Nadia ta popular tambe riba Social media.  Su cuenta di Instagram mes tin 490 mil follower, y esaki ta sigui crece tur dia.