Premier Wever-Croes a realisa algun reunion y encuentro cu varios lider di diferente pais

Durante su estadia na Honduras,

ORANJESTAD (AAN): Siman pasa, Prome Minister Evelyn Wever-Croes a representa Reino den e traspaso di mando pa e Presidente nobo di Honduras, señora Xiomara Castro.

            Durante su estadia cortico na Honduras, Prome Minister a reuni y tabata tin encuentronan cu diferente otro lider di paisnan na unda cu a toca diferente tema.

            Entre otro Prome Minister tabata encuentro cortico cu Vice Presidente di Merca, señora Kamala Harris, Vice Presidente di Argentina, señora Cristina Fernandez, Vice Presidente di Republica Dominicana, Raquel Peña y cu e Presidente di Honduras. Tur ta hende muhe lider den nan pais.

            Prome Minister a comparti temanan relaciona cu Aruba en general, e posicion di Aruba den region, posicion di hende muhe na Aruba y e retonan causa door di Covid y e maneho exitoso cu Aruba a implementa durante e periodo di dos aña di e pandemia mundial.

            Tambe Prome Minister tabata tin un encuentro hopi interesante cu e Minister di Asuntonan di Exterior di Venezuela na unda a toca e tema di inmigracion, e tema di frontera y e retonan grandi cu Aruba y Venezuela, dos pais asina cerca di otro, ta confrontando.

            “E encuentronan ta sumamente fructifero. Mester bisa cu nan ta aprecia enormemente e posicion cu Aruba ta tuma. Hopi ta conoci cu e manera con Aruba ta maneha crisis, tanto financiero prome cu Covid como e crisis di Covid mes y riba esaki tin hopi pregunta. Esey ta cosnan cu ta yena mi cu hopi alegria y orguyo.

            Honduras ta un pais grandi hopi bunita y hopi rico cu hendenan amabel. Por mira tambe e pobresa cu tin siendo. Di berdad nos como Arubiano nos ta sinti nos hopi bendiciona na Aruba. Y cada un di nos tin cu sigui traha pa nos tin un democracia hopi fuerte y stabiel na Aruba”, Prome Minister Evelyn Wever-Croes a expresa.