DUBAI: Prome Minister Gilmar Pisas di Curaçao ta na Dubai pa asistí na e conferensia di COP28 cu lo finalisa dia 10 di December 2023.
En total 195 estado ta representa, cu 97.372 participante. E apertura di e conferencia tabata Diabierna pasa, unda e.o. Pisas a topa entre otro Presidente di Brazil sr. Luiz Inacio Lula da Silva y a informa esaki cu Curaçao lo bay haci lo maximo pa na aña 2025, e isla por firma pa ta parti di e Acuerdo di Paris na Brasil, caminda e siguiente COP30 lo tuma luga.
Durante di e conferencia aki Prome Minister sr. Pisas a haya e oportunidad pa participa y hiba discurso na diferente actividad. E tabata e unico di Caribe Hulandes cu a participa den e delegacion di Reino na COP28.
COP ta e conferencia di partidonan, firmante di e Tratado di Paris, di e Organizacion di Nacionnan Uni riba Cambio di Clima (UNFCCC).
COP ta tuma luga anualmente y ta e cuerpo di Nacionnan Uni cu ta encarga cu tumamento di decision, monitoreo y ta revisa e implementacion di e tratado.
Cada Partido na e conferencia mester entrega nan Plan di Accion di clima Nacional, yama “Nationally Determined Contributions” (NDCs).
E NDC ta contene accionnan cu e partido lo tuma pa frena cambio di clima pa yega na e metanan di e Acuerdo di Paris. Tambe e NDC ta contene accionnan cu e partido lo tuma pa proteha y adapta na e impactonan di cambio di clima.
Curaçao ta trahando riba su plan strategico di cambio di clima y ta investigando e pasonan necesario pa por completa e condicionnan y bira partido na e Acuerdo aki. Conseho di Minister na Willemstad a aproba recientemente e “roadmap” pa yega na un plan strategico pa atende cu cambio di clima.
Sinembargo Curaçao tin di traha duro tambe riba e Ley di Cambio di Clima, un maneho pa cambio di clima y ratifica e diferente tratadonan (Rio Convention 1992, UNFCCC di 1994 y Kyoto Protocol di 97) cu ta necesario pa por bira partido di e Acuerdo di Paris (2015).
Durante COP28, Curaçao lo haci su mes fuerte pa subraya e vulnerabilidad como un pais y isla chikito, tambe lo enfoca e hecho cu, aunke Curaçao su contribucion na cambio di clima ta minimo, e isla tambe ta sinti e efectonan global di cambio di clima manera e ola di calor e aña aki cu a cuminsa for di Juni.
Curaçao tabata presente como observador na COP28 y a representa paisnan den Reino durante entre otro e sesion di WCAS (Water Presidency Session) na COP28.
