Premier Eman ta traha pa Aruba asumi liderazgo den solucion regional pa maneho di desperdicio

Reciclahe, economia circular y produccion di energia central riba agenda

• Aruba ta explora cooperacion cu Boneiro y Corsou 

ORANJESTAD (AAN): Prome Minister Mike Eman ta sigui cu su esfuersonan pa explora un solucion regional pa e problematica di maneho di desperdicio na Aruba, Boneiro y Corsou. Durante un encuentro cu burgemeester di Utrecht, Sharon Dijksma, e prome minister a presenta e progreso cu Aruba a logra desde mei di e aña aki, ora e mandatario a discuti cu e burgemeester e posibilidad pa Aruba asumi un rol di liderazgo den e iniciativa.

   Dijksma, kende ta tambe presidente di Vereniging van Nederlandse Gemeenten (VNG), a propone e idea durante su bishita na Aruba na mei ultimo pa e posibilidad pa e tres islanan coopera den maneho di desperdicio. Segun Eman, cada isla ta enfrenta reto similar y un solucion conhunto por crea e cantidad necesario pa procesa desperdicio na un manera mas eficiente y duradero.

   E vision ta pa un di e islanan por funciona como punto central pa concentra desperdicio for di e tres islanan. Esaki por crea oportunidad pa reciclahe, economia circular y transformacion di desperdicio den otro producto. Pa material cu no por wordo recicla, por explora tecnologia moderno pa procesamento y eventualmente produccion di energia.

   Aruba a tuma iniciativa y a explora cooperacion: "Nos a tuma e peticion aki na serio. Nos a haci nos trabou pa prepara, nos a bishita Boneiro, nos a bishita Corsou y nos a papia cu stakeholders na Aruba", Eman a declara. E prome minister a menciona cu su gobierno a sostene combersacion cu Serlimar y EcoTech na Aruba, ademas di e contactonan cu diferente stakeholders na Boneiro y Corsou.

   Segun Eman, e encuentronan aki a mustra interes pa explora un modelo di cooperacion regional. Como parti di e preparacion, Eman a bishita tambe e empresa HVC na Alkmaar, unda su delegacion a conoce un facilidad moderno pa procesamento di desperdicio y produccion di energia. E prome minister a destaca cu e operacion di HVC ta mustra con procesamento di desperdicio por tuma luga den un ambiente profesional, limpi y controla, cu tecnologia moderno.

   Kingdom Summit como siguiente paso: Durante e encuentro na Utrecht, Eman a informa Dijksma di e progreso logra for di luna di mei. Segun e prome minister, e burgemeester a expresa satisfaccion cu Aruba no solamente a sigui cu e iniciativa localmente, sino cu a explora e interes di Boneiro y Corsou tambe. E siguiente paso ta pa evalua si durante e proximo Kingdom Summit na Sint Maarten por avansa e combersacionnan cu participacion di e diferente pais y isla den Reino.

   Eman a destaca cu e iniciativa ta forma parti di su vision pa duna cooperacion den Reino un contenido nobo, cu enfasis riba e proyectonan concreto cu ta beneficia e region. Como otro ehempel, el a menciona e cooperacion cu Wageningen University & Research, cu ta explorando e posibilidadnan pa establece un presencia permanente na Aruba. E iniciativa aki por fortalece investigacion, crea oportunidad pa hoben profesional y permiti Aruba comparti conocimento cu otro pais den Caribe. Cu e esfuersonan aki, Gobierno di Aruba ta sigui explora e posibilidadnan pa transforma e retonan ambiental den oportunidad di desaroyo economico y cooperacion regional.

   Durante e encuentro na Utrecht, Prome Minister Mike Eman tabata acompaña pa Minister Plenipotenciario di Aruba, Mildred Schwengle, y Minister di Turismo, Transporte y Labor, Wendrick Cicilia.