Durante entrega di buki Volk van Veerkracht na Den Haag
ORANJESTAD (AAN): Durante un encuentro special cu personanan cu a contribui na skirbi un buki cu ta relata nos isla durante Status Aparte y e desaroyo di Aruba durante e ultimo 40 aña, Prome Minister Mike Eman a expresa su agradecimento pa nan contribucion na historia di nos pais. E encuentro a reuni diferente personalidad cu, tabata den funcion di miembro di Tweede Kamer, minister, secretario di estado of den otro funcionnan, a desempeña un rol importante den e proceso di autonomia di Aruba.
Durante e encuentro na ZZIIN Stadspaleis Den Haag, Prome Minister Eman a reflexiona riba e circunstancianan dificil cu Aruba a enfrenta na momento di introduccion di Status Aparte na 1986. Cu ceramento di refineria Lago na 1985, Aruba a perde un parti grandi di su entrada economico, mientras cu desempleo a alcansa aproximadamente 35%.
A pesar di e crisis, Aruba mester a establece su propio institutonan manera, Parlamento, Gobierno, Banco Central y introduci su propio moneda. Un di e momentonan historico cu Eman a destaca tabata e apelacion cu su tata, Henny Eman, a haci na pueblo Arubano pa sostene introduccion di Florin Arubano. Segun e prome minister, hopi ciudadano a demostra nan confianza den futuro di Aruba door di cambia nan placa di spar di Florin Antiyano pa Florin Arubano, a pesar di e incertidumbre economico cu tabata reina na e momento ey.
Pa Prome Minister Eman, e gesto aki ta representa un di e ehempelnan mas significativo di e determinacion y sacrificio di pueblo Arubano. E capital mas importante cu Aruba tabatin pa cuminsa como pais autonomo no tabata solamente e recursonan financiero, sino e curason, determinacion y curashi di su pueblo. Eman a conclui cu e mesun boluntad y compromiso cu a permiti Aruba supera e retonan di su prome añanan como pais autonomo, ta sigui representa un di e rikesanan mas importante di nos pais pa enfrenta futuro.
Den cuadro di conmemoracion di 40 aña di Status Aparte, Prome Minister Eman a entrega na cada participante un ehempel di e buki Volk van Veerkracht – 40 jaar Land Aruba, compila pa Rene Zwart y historiador Luc Alofs. E publicacion ta relata e desaroyo di Aruba desde 1986 y ta inclui contribucionnan di diferente personalidad, incluyendo recuerdo di esnan cu a conoce e prome Prome Minister di Aruba, Henny Eman.
{gallery}Premier Eman a enfatiza cu e capital mas importante di Aruba ta e curason, determinacion y curashi di su pueblo{/gallery}
