Ombudsman mr. Jurima Bryson:
ORANJESTAD (AAN)-- Ombudsman mr. Jurima Bryson, den entrevista cu DIARIO, a comenta cu no ta secreto cu Aruba su poblacion ta bayendo den un direccion di vergrijzing, y esey ta nifica cu pa e motibo ey, mas ainda tin cu bay traha na un manera structura, pa locual ta trata toezicht.
El a enfoca riba e parti humano. “E Ley di Ombudsman ta papia di manera explicito encuanto derecho di hende y derecho di mucha. Ora nos ta papia di derecho di hende, tur adulto mayor, e adicto, esun cu ta recuperando di adiccion, esun cu ta sin un dak riba su cabes pa cualkier motibo, tin e derecho di wordo trata cu dignidad, tin derecho pa cuido medico, y tin derecho pa biba sin miedo”, Ombudsman mr. Bryson a expresa.
Esaki ta den e carta di preocupacion cu Bureau Ombudsman a dirigi na Minister di Salud Publico, y señora Bryson a indica cu e ta basta largo (seis pagina), e ta publica den nan website y esnan cu tin interes pa lese por drenta den e website. E ta traduci den tres idioma.
“Nos a duna diferente punto cu nos ta pidi ‘feedback’ di dje, tambe tin e puntonan cu nos ta bisa cu esnan ta e puntonan cu nos ta premira cu, en todo caso, por haci un cambio, unda cu nos por alivia e situacion cu ta pasando aworaki nos ta keda na spera, 7 di October tabata hopi reciente, normalmente nos ta pidi seis siman pa nos bisa pa duna nos un feedback encuanto esaki”, mr. Bryson a agrega.
El a añadi cu mara na e tema aki, tin diferente tema cu den transcurso di tempo Bureau Ombudsman a tene su mes bezig cu ne, banda di e parti di instancianan priva cu ta duna opvang, ayudo, tambe tin e parti con nos instancianan medico ta handle cu adulto mayor. “Tin diferente preocupacion cu a yega na mi orea, por ehemplo, un di nan ta docternan di cas cu no kier haci huisbezoek, na hendenan grandi cu malesa cronico of cu, por ehemplo ta cay den meymey, pasobra na un caminda of otro cos no ta bay bon, pues, tin diferente punto cu di un of otro manera nos ta takel, papiando cu instancianan concerni y tambe, corda bon Ombudsman no ta solamente pa identifica un keho. E intencion ta pa wk si nos tin un solucion pa e ciudadano”, Ombudsman mr. Jurima Bryson a remarca.
