Setty Christiaans- Yarzagaray:
ORANJESTAD (AAN) – Den conferencia di prensa di fraccion di MEP, Parlamentario Setty Christiaans-Yarzagaray, a duna di conoce cu Diabierna, tur fraccion den Parlamento a entrega nan “verslag” riba e preguntanan cu nan a haci encuanto COHO y RAft, y cu nan tabata wardando contesta e dia ey.
Parlamento a prepara pa Diabierna cu a pasa pensando cu nan lo a haya contesta di Hulanda, locual no a sosode.
Christiaan-Yarzagaray a señala cu durante e reunion di IPKO na Mei ultimo, den cual e tabata presente, papiando cu diferente di e fraccionnan di Tweede Kamer y di Eerste Kamer, y nan a haya indicacion cu, tanto e ley di COHO como di RAft, pa Aruba, lo wordo trata prome cu e “zomer recess” na Hulanda cu ta bin na Juli; pero pa esaki nos por a ricibi e contestacion riba e preguntanan cu tur e fraccionnan di Parlamento a haci, no solamente esnan cu Aruba a entrega pa loke ta COHO, pero tambe Corsow y St. Maarten.
“Nos a compronde si, cu e partidonan cu ta involucra den e proceso ta sintando na mesa cu otro, pero di nos banda di Parlamento nos no a haya e contestacion ni e claridad y di con eigenlijk nos no a wordo contesta, y e ora ta hiba nos na e pregunta si e leynan aki ta cla, pa wordo trata, prome cu e recess di verano di e aña aki”, Parlamentario Setty Christiaans -Yarzagaray a indica.
Christiaans-Yarzagaray sa y ta spera, cu nan tin atencion pa e preocupacion di Parlamento di Aruba, y nan preguntanan, pero den e caso aki, pensando cu nan ta considerando tur e inkietudnan riba tanto e Ley di COHO y loke ta regarda Aruba, e RAft. El a bisa cu den e caso di COHO, mayoria di condicion ta den ehecucion caba, sigur locual ta regarda e Landspakket, y por mira cu Aruba ta cumpliendo cu e gran mayoria di su aspectonan y ta di spera cu di parti di Hulanda nan ta considera enberdad, cu ta tene nos puntonan den consideracion, tur nan inkietudnan. E dama a indica cu e siman cu ta bin lo busca e contacto cu e diferente fraccionnan y e parti di Tweede Kamer na Hulanda, pa wak ki claridad Aruba ta ricibi, tocante di con Parlamento no a haya ningun contesta riba esaki. E tin e sensacion cu nan ta poniendo atencion na e preguntanan y preocupacion di Aruba, y e ta spera cu enberdad esaki lo ta e caso.
