Segun Dr. Jones di HAVA:
ORANJESTAD (AAN): Dr. Jilian Jones di Asociacion di Docternan di Cas (HAVA) a duna di conoce cu docternan di cas tabata tin oportunidad pa haya informacion relaciona cu e structura nobo y compronde kico Geestelijke Gezondheidszorg (GGZ), esta Salud Mental ta pa loke ta e praktijk di docternan di cas na Aruba.
El a bisa cu tin pasonan hopi importante ta wordo tuma pa cu e vision di GGZ stuurgroep tin pa cu salud mental na Aruba. A yega hopi leu pero ainda ta falta un tiki manera e motivacion cerca algun docter di cas.
Dr. Jones a laga sa cu a espera di conta cu un participacion un tiki mas grandi den e actividad aki. Pero den e lunanan cu ta sigui lo trek nan bek, pasobra HAVA ta compronde e importancia di salud mental na Aruba.
El a laga cu e docternan di cas hopi biaha por senala cerca nan pashentnan esnan cu por tin problema caba. E peticionnan ta hopi grandi y ta hopi trabao pa e docter di cas so por handel, pesey den e praktijk mester di personal di apoyo. Esey ta consisti di un POH GGZ cu tambe ta riba e agenda di e 'stuurgroep'.
E sistema cu nan ta bezig desaroya pa e 'tweedelijn', pero si no ta atende cu e problemanan den e 'eerstelijn' toch ta keda buraco den e cadena di cuido di salud mental, a remarca.
El a agrega cu un pashent ta wordo referi pa un specialista a base di e kehonan, di e situacion, entre otro, cu ta scoge pa dirigi un pashent pa sea e Basis GGZ of e parti specialisa. Esaki ta cuido cu ta mas caro, cu ta tuma mas tempo tambe y no ta e intencion pa yena e 'tweedelijn' cu tur e pashentnan.
E grupo mas grandi lo keda den e linea di cuido primario, pesey e docternan di cas mester wordo reenforsa cu e POH GGZ (personal di apoyo den salud mental), asina Dr. Jones a duna di conoce.
