Dr. Van Trigt, presidente HAVA:
ORANJESTAD (AAN) – Durante e conferencia di prensa na ocasion di a firma e acuerdo di continuidad di e servicio di POH’s, pa fortifica e cuido medico na Aruba, e presidente di e Asociacion di Dokternan di Cas (HAVA), dr. Joaquin van Trigt a hiba palabra.
Van Trigt a mustra contento cu e bon noticia cu lo haya un ampliacion di e cantidad di Praktijk Ondersteunernan y el a duna un apreciacion un tiki mas personal tocante kico un POH ta nifica pa e dokter di cas.
Van Trigt a bisa cu e volumen di trabao y cantidad di pashent a crece hopi pa e dokternan di cas e ultimo tempo, ya cu nan ta haci hopi mas cu e parti di cuido, pero ademas management, y e tempo cu nan por dedica na cada pashent a baha.
P’esey ta hopi importante pa dokternan di cas tin mas man y pia eyfo. Hendenan cu por yuda nan señala unda tin problema y cu e dokternan por target e problemanan mas eficientemente.
“E Praktijk Ondersteuner ta haci exactamente esey. E ta traha den nos praktijk, e ta parti di nos personal eigenlijk aunke e tin dienst cerca WGK. Nos tin coordinacion, overleg casi tur dia tocante nos pashentnan. E bon di POH ta cu e ta dedica su tempo na cada pashent cu tin malesa cardiovascular te awo, y awo ta bin acerca pashentnan cu tin problema di salud mental (GGZ). E POH tin mey ora, tin biaha te un ora, pa inverti den cada pashent, mientras cu cada dokter di cas tin 10 pa 15 minnut pa cada pashent”, van Trigt a splica.
El a agrega cu e atencion cu e pashent ta haya di e PHO ta mas intensivo y personal. Tin pashent ta puntra si nan no ta wak nan dokter di cas mas. E dokter a bisa cu esey no ta cuadra. Por ta nan tin menos contacto pero e dokter tin contacto si, cu nan POH, cu ta nan mensahero y nan wowonan.
“Pues, di cada pashent cu ta sufri di Diabetes, Presion Halto, y awo tambe Salud Mental. Un biaha pa aña si, nos ta wak cada pashent, nos tin un control anual, y e pashentnan ta yama e POH docter, nan no ta wak e diferencia mes. Pues, nan ta haya e cuido adecua y hopi biaha esey ta duna nos un alivio y un noticia cu e Praktijk Ondersteuner ta yuda nos haci nos trabao mas eficiente y mas directo, y nos por concentra nos mes riba otro tareanan tambe cu ta hopi compleho. Dus, nos sa hopi contento cu e ampliacion y nos ta spera cu esaki ta un di e prome pasonan den e fortificacion di e cuido di prome liña, cu ta bay ta hopi esencial den e siguiente añanan pa mantene nos seguro AZV sostenible, pagable y di bon calidad pa cada asegurado”, dokter van Trigt a conclui.
