Potretnan a circula di e prome dia di Prinses Amalia na Universiteit van Amsterdam

ORANJESTAD (AAN): Sigur un etapa nobo a cuminza pa Prinses Amalia di Hulanda,

kende a converti su mes oficialmente den un studiante di Universiteit van Amsterdam riba Dialuna 5 di September.

   E heredero di trono Hulandes, kende na December lo cumpli 19 aña di edad, a cuminza su estudio di Politica, Sicologia, Ley, y Economia, y Cas Real Hulandes mes a comparti algun potret di e prome dia aki na e facultad, unda por mire ta cana cu un sonrisa grandi riba su cara.

   Pa e prome contacto cu su coleganan di klas, cu su profesornan, y cu demas personal, e Prinses van Oranje a dicidi na usa un look hopi comodo y cu ta hopi trendy.  E yiu muher di Rey Willem-Alexander y Reina Maxima, a bay les cu carson blanco, keds blanco, camisa cu un estampado etnico, un jas, y un tote bag pa warda su schriftnan.

   Despues di a tuma un aña liber, Prinses Amalia a resumi su lesnan.  El a escoge e Universidad despues di un proceso di aplicacion y seleccion cu el a haci aña pasa caba.  Door di escoge Universiteit van Amsterdam, el a kibra e tradicion di studia na Leiden, manera su tata, su wela Prinses Beatrix, y su bisawela Reina Juliana.  Awor e tin un curso intenso su dilanti cu un rooster hopi exigente.

   Tur cos ta mustra cu ya caba otro luna, esta October mes, e lo tin su prome examennan pa haci, y Prinses Amalia ta enfoca pa haci su best.

   “Mi tin hopi gana di cuminza cu les.  Mi ta spera di conoce hopi hende, siña cosnan nobo... pero estudio ta bin prome.  E no ta djis diversion y fiesta,” el a bisa prome cu el a cuminza cu lesnan, den su biografia.

   E Prinses van Oranje a bira independiente tambe, esta cu el a stop di biba cu su mayornan y su ruman muher chikito na Den Haag, pa bay ubica su mes na Amsterdam.  Cambiando Paleis Huis ten Bosch pa un cas cerca di e caya comercial popular di Oude Spiegelstraat y Wijde Heisteeg.  E lo no ta su so, pasobra e cas mes, cu ta propiedad di famia Dreesman, ta wordo comparti cu mas studiante.  Dilanti di e cas, Prinses Amalia lo tin su mesun lugar pa staciona auto, si acaso e kier core den auto.  Tin di remarca cu algun siman pasa el a haya su rijbewijs.

   E yegada di Prinses Amalia na Universidad tabata rondona ultimo simannan pa controversia.  E heredera Hulandes tabatin intencion di drenta den un ‘asociacion di studiante’ (conoci como ‘sorority’), pero su plannan a cambia despues cu un video a circula unda bo ta mira miembronan di Amsterdamsch Studenten Corps y Amsterdamsche Vrouwen Studenten Vereniging a lanza insultonan misoginistico y sexista durante un fiesta teni na Juli.  Despues di a haya sa di e imagennan aki, Cas Real a confirma cu e yiu muher di Rey lo no drenta e grupo aki.

   Preparando pa bishita Aruba: Na comienzo di 2023, Prinses van Oranje lo bay dal un paso institucional nobo, door di haci su prome viahe oficial pa exterior.  E lo bin bishita Caribe Hulandes, unda e lo bishita Aruba, Curaçao, y St. Maarten, y tambe islanan Bonaire, St. Eustatius, y Saba.  E lo bay ta acompaña pa Rey Willem-Alexander y Reina Maxima.