Post Aruba a emiti un serie nobo di stampia cu paisahenan di Aruba

ORANJESTAD (AAN): Desde 1 di november 2022, Post Aruba N.V. a emiti un serie nobo di stampia.

E serie aki yama ”Paisahenan di Aruba” y a keda diseña pa Sr. Elvis Tromp.

   Pa chikito cu Aruba ta, e ta rico na diferente sorto di paisahe. Mayoria paisahe ta den forma di desierto, como cu e clima ta seco durante henter aña. Na e parti zuid e paisahe ta basta plat cu algun kilometro di playanan blanco y e lama ta relativamente calmo. Den e parti nort tin algun sero y ta ey e lama ta bruto. E lama bruto di e costa di nort a percura pa formacion di diferente brug natural.

   Loke ta yama e atencion masha den e paisahe di Aruba ta e acumulacion di baranca grandisimo, cu ta origina di actividadnan volcanico. E formacionnan di piedra grandi na Ayo y Casibari ta hopi conoci.

   Hooiberg por mire den e parti mas plat di Aruba. For di e punta di e sero bo tin un bunita bista riba henter e isla. 

   E faro di California (na Hudishibana) ta para den forma imponente memey di un paisahe bunita cu ta forma un frontera cu e duinnan na un banda y na e otro banda e lama turkesa blauw.

   Debi na e biento noordoost e palonan di watapana y fofoti ta crece den direccion zuidwest. E palonan aki cu ta crece den direccion di e biento, ta masha famoso y hopi biaha nan ta sirbi como material di promocion pa Aruba.  E matanan di aloe y cadushi ta percura pa un totalidad unico y espectacular.

E serie di stampia aki y e Envelop Prome Dia di Emision ta obtenibel na tur postkantoor tanto na Oranjestad como na San Nicolas y riba e web-pagina postaruba.com/stampshop

Percura pa bo tin e serie di stampia aki den bo coleccion, como cu e cantidad ta limita.