E posicion di DIARIO cu democracia no por sirbi Covid-19 a haya sosten - *Companianan grandi manera Shell lo kier exigi personal pa bay vacuna - *Personal di Gobierno Federal di Merca mester vacuna pa keda na trabou
ORANJESTAD (AAN) — For di momento cu DIARIO a cuminsa atende cu e Coronavirus nobo cu a haya e nomber di Covid-19, DIARIO a asumi e posicion cu no por uza democracia pa sostene protestanan contra vacuna.
Ayera mientras e total internacional di morto cu e malesa a produci a surpasa 4.6 Miyon, mundo tabata na careda pa pone den practica e unico arma efectivo den e lucha contra Covid-19.
Tanto gobiernonan na diferente pais como companianan mundial grandi a cuminsa mobilisa oficialmente contra e malesa y asina a bira conoci cu e compania gigante petrolero ta considera pa haci vacunacion contra Covid-19 obligatorio pa tur hende cu kier ta den su servicio.
Shell ta uno di e companianan grandi di mundo cu a dicidi cu mester cera porta pa e malesa sigui progresa dor di tuma medida contra personanan cu ta nenga e vacuna, cu ta e unico arma efectivo contra e malesa mortal cu ta destrui bida di hende.
Na Merca, ayera a drenta informacion cu Presidente Biden ta lansa un ofensiva grandi contra e malesa y cu empleadonan di e Gobierno Federal di Merca, personanan cu ta traha den cuido entre otro, mester ta vacuna pa nan por traha.
Na diferente pais ayera trahadornan den cuido a bini cu e demanda pa impone vacunacion pa asina evita cu Covid-19 ta sigui plama cu tur problema cu esaki ta nifica pa hende.
E guera contra Covid-19 no ta un acto contra democracia, ta palabranan cu a cay durante ultimo dianan mientras empresanan internacional y gobiernonan ta introduci medida contra personanan cu no kier vacuna.
Na mas y mas evento hende lo mester entrega prueba cu el a vacuna pa asina cera porta cu e ta bira causante di mas morto di personanan cu e ta contagia.
Mundo mester tuma medida na momento cu, manera tambe DIARIO a adverti, no por cera wowo mas pa e progreso di Covid-19 cu hende no a logra stop manera originalmente a wordo pensa na 2020.
Ayera Japon a drenta noticia na momento cu informacion a drenta cu e campeonato mundial di football lo no sigui na Japon debi na e situacion di Covid-19.
Microsoft tambe a tuma medidanan na interes di salud di su trahadornan na Merca cu e no ta permiti bolbe trabou den oficina.
E forma cu democracia a wordo uza pa evita cu medida efectivo lo a wordo tuma contra Covid-19, a cuminsa basha abou rond mundo cu ta den problema serio riba tereno economico, financiero y social causa pa e cantidad di infeccion cu ta tuma luga diariamente y ta afecta hende riba tur tereno.
Manera DIARIO a indica den su edicion di ayera, 2022 ta yega mas cerca cu un menasa mas serio di Covid-19 cu porfin ta topa cu e unico pasonan cu por garantisa cu personanan cu si ta dicidi pa deshaci di e riesgo di morto dor di vacuna, ta bira victima di personanan cu ta nenga di vacuna y asina ta bira complice di progreso di e malesa.
