ORANJESTAD (AAN)—Premier Wever-Croes, a splica, den su mensahe pa pueblo di Aruba, relaciona cu e formacion di Gabinete Wever-Croes II,
cu finalizando aworaki cu dicho proceso, lo sigui pa confirma e ekipo cu lo forma e fraccion di MEP y di RAIZ den Parlamento.
E mandatario a expresa su bon deseonan pa tur minister nobo y tambe palabranan di gradicimento na tur esnan cu a yuda den e proceso di formacion, su votadornan y pueblo.
“Mi ta felicita tur colega Minister, y mi ta desea tur hopi exito pa realiza nan trabaonan na bienestar di e ciudadanonan di nos pais. E periodo tras di lomba tabata un periodo duro cu a tuma hopi energia, pasobra banda di mi trabao diario como Prome Minister, como commander en Chef di e crisis di corona, mi tabata tambe Parlamentario y Formador. Y mi kier a gradici tur esnan cu a yuda den e proceso aki, y specialmente e 115 stakeholders cu nos a reuni cu nan caba y ainda esnan cu nos lo reuni cu nan den e dianan venidero. E dianan nos dilanti nos lo bin Bestuurskantoor pa cuminza traha mesora, den e prome conseho di minister.
Den e prome reunion di Ministerraad nos lo aproba e ora ey e nombracion di Minister Plenipotenciario, pa e tambe por huramenta Despues di esey. Awor pues, nos por cuminza goberna, na final di dia gobernacion ta trabao di ekipo y partnership. Y nos, gobierno, parlamento, sector publico y sector priva lo demostra esaki trahando hunto. Un ekipo cu un solo meta, cu ta Aruba. Cu un orguyo inmenso mi ta presenta awo Gabinete Wever-Croes II, e gobierno cu pueblo a scoge pa goberna.
Na tur nos votadornan, di curazon danki pa boso sosten, dunando nos partidonan, na tur nos votadornan y tur nos ciudadanonan na Aruba, nos lo lora manga mesora pa sigui traha pa asina nos por enfrenta tur e retonan cu tin nos dilanti, cu tur transparencia, comunicando cu comunidad, pa sirbi abo na e miho forma posible, nos lo no defrauda bo. Cu Dios bendiciona nos dushi baranca Aruba”, Prome Minister Evelyn Wever Croes a conclui.
