Ebrina Curet, di Scol Saludabel Aruba:
ORANJESTAD (AAN) — Ebrina Curet, Consehero huridico na Scol Saludabel Aruba, Departamento di Salud Publico, a agrega den entrevista cu DIARIO a bisa cu e porcentahe di muchanan cu sobrepeso y obesidad cu tin na Aruba bao edad di 11 y 12 aña, ta core alrededor di 43%.
El a agrega cu e muchanan aki ta na riesgo halto di sigui cu sobrepeso y obesidad na edad adulto y cu tur e consecuencianan cu esaki ta trece cu ne, manera malesanan cronico manera presion halto, colesterol, diabetes, etc.
Curet a indica tambe, segun e investigacion cu a wordo haci, cu e percepcion den comunidad awo ta cu cuminda saludable ta caro, pero si haci cambionan chikito manera no cumpra juice of refresco aynan ta resta placa pa siman, cu por uza pa cumpra productonan mas saludabel, manera fruta, pan integral pa e mucha come na cas y/of hiba scol. Pues, laga e productonan menos saludable afo, y keda cu suficiente placa pa haci scogencianan mas saludabel.
“Nos tin cu para tur e bebidanan cu tin eyfo, locual nos curpa no mester di nan. Loke nos mester di dje ta awa, y awa mi kier sa ta 0.044 cent, pues wak con hopi mas barata awa ta en comparacion cu e juicenan cu nos ta cumpra, cu no solamente ta bay duna nos exceso di sucu, y nos curpa no mester di dje.
E investigacion ta mustra cu si e bebida tin un poco smaak, nos ta bebe un poco mas lihe. Si nos no ta custumbra bebe awa, ta dificil pa beb’e.
Loke nos por haci ta corta pidanan di anasa, blachi di mint, den e awa. Nos ta yame ‘infuse water’ cu ta dune un sabor cu nos ta bebe hopi mas lihe y hopi mas di dje. E ora ey nos ta sacando afo bebidanan cu hopi sucu y lagando e muchanan bebe hopi mas awa”, el a señala.
Curet ta agrega pa den e cambionan laga e mucha desayuna na cas. No mester bay come full un desayuno grandi pero algo chikito, manera un yogurt abao den sucu, y ora e mucha bay scol e por concentra hopi miho, y durante e dia e ta bay tin menos gana di come coi dushi.
