ORANJESTAD (AAN) – “Dia 8 di April di aña 2013, Top FM bao liderazgo di señor Efito Croes, a percura pa graba e documentario ‘Roy Sneek, Documentario di un Piano-Tecnico’
cu a wordo subsidia door di UNOCA bao liderazgo di señora Lupita Gil”. Asina maestro Sneek ta sigui relata su trayectoria di 30 aña den e profesion aki.
Maestro Sneek ta agrega cu e curso na Merca tambe a wordo financia door di UNOCA, bao direccion di señor Pancho Geerman, na cual señor Sneek tin hopi gratitud pa nan confianza, cu den tur dos proyecto el a logra.
“Tele Aruba a puntra mi persona si nan mag haya e documentario pa pase na nan programa, pasobra Top FM no tin television. Top FM a bay di acuerdo pa mi a duna autorizacion pa nan pase, y regularmente, Tele Aruba ta pasa e documentario ey, y tambe e por wordo mira via YouTube”, señor Sneek a indica.
El a sigui conta nos cu un aña despues, esta dia 15 di April UNOCA, bao guia di señora Lupita Gil a duna aprobacion pa duna un curso di piano-tecnico na cuater interesado.
“E curso tabata hopi intensivo, basta pisa, y prome cu a cuminza cu e curso, mi exigencianan tabata halto pa e cursistanan na Aruba. Mas halto di loke nan a pidi mi na Merca.
Por ehemplo, nan mester a yena un formulario entre otro, relaciona cu condicion di bista, oido, problema cu lomba, man, etc. Ki otro instrumentnan ta toca si ta cu man robes of drechi.
Despues di tres luna a completa e curso, tres biaha pa siman, tres ora cada biaha y nan mester a haci training na cas tambe riba nan piano. Nan a pasa e curso completo, pero lamentabelmente nan no por haci e trabao aki continuamente pa via di nan trabao mes of otro prioridadnan”, maestro Sneek a duna di conoce.
