Rulienne Arends, Trahador Preventivo di FADA:
ORANJESTAD (AAN) – E trahado preventivo di FADA, Rulienne Arends, a splica den un entrevista cu DIARIO, cual ta e peligro y consecuencianan cu uso di vaping ta trece cu ne.
El a bisa cu hopi biaha ora FADA ta papia cu e hobennan cu ta uza vaping (cigaria electronico cu ta emana vapor) pa wak cual ta e grupo cu informacion ta yega na dje, nan ta spanta vooral ora nan ta wak e parti di nicotina, y e informacion ta mustra cu 90% di nan no ta na haltura cu e ta contene nicotina. E preocupacion vooral, ta bao di e hobennan cu no ta worry. Un grupo hopi grandi no ta worry y gewoon ta haci uso di dje.
Informacion for di Merca cu FADA tin, ta indica cu hopi biaha e hobennan cu ta cuminza haci uso di vaping mas lihe nan tin tendencia di bay na otro substancia, por ehemplo cigaria cu ta contene mas nicotina, pero tambe na otro productonan tambe, y ta core e riesgo di bay na marihuana, cu tin den e azeta uza pa e vaping.
Loke ta hacie un tiki mas dificil ta ora mayornan na cas tambe ta use y ta permiti nan yiunan tambe pa haci uso di dje. Ora cu tin artistanan ta propaganda esaki, loke nan ta wak riba social media nan tambe ta gusta haci’e. “Si un artista ta haci’e pakico ami no por haci’e?” ta un argumento cu e hobennan ta uza. Y tin influencers cu tin ora, sin cu nan por yuda, ta propaganda pa atrae un hoben pa haci uso di esaki, y esey ta un di e peligronan cu tin tambe. Asina Rulienne Arends, Trahador Preventivo di FADA a señala.
