Un analisis pa duna conseho na mr. dr. Rycond Santos do Nascimento
*E circo di Mike na 2014 y su huida na 2017 ta pio cu su entrada
*dr. Mito Croes a skirbi su nomber cu pen di oro den Reino Hulandes
ORANJESTAD(AAN)—Ta cu hopi atencion, nos ta sigui tur declaracion di mr. dr. Rycond Santos do Nascimento, un Arubiano cu aspectonan prometedor pa por sirbi interes di Aruba na e momentonan aki.
Sinembargo, no ta capacidad intelectual solamente, ta transforma un hende den lider. Mester tin loke nos ta yama na Ingles e “frame of mind”, e boluntad personal pa sirbi e pais y asina tur miembro di comunidad y nan balor humano cu ta exigi e calidad mas halto di entrega na nan causa.
Mr. dr. Rycond Santos do Nascimento a haci su entrada den politica bou liderazgo di Mike Eman, cu a entrega prueba di tur loke politica no mester ta.
Awe cu e produccion di gobernacion durante gobierno Mike Eman a produci tur motibo pa reforma fiscal, reforma social, reforma economico, reforma politico y hasta reforma di leynan criminal, mr. dr. Rycond Santos do Nascimento ta presenta su mes como guerero pa reforma cu mester ta basa riba e ehempel cu dr. Mito Croes a laga atras.
Nos ta completamente di acuerdo cu Santos do Nascimento, cu dr. Mito Croes kende a skirbi su nomber cu letternan di oro den historia di Reino Hulanes, mester bira un ehempel di gobernante.
Pa e reforma necesario por socede, mester inspira Pueblo pa hisa cara y mira un Arubiano, mr. Mito Croes, cu na e forma mas simpel cu hende por idea, a traha pa su pais y pa henter Reino.
E dignidad di simplesa di mr. Mito Croes, a demanda respet pa e Arubiano y pa Aruba. Cada palabra cu el a papia, a yena e copa di oro cu e kier a presenta na mundo como imagen di Aruba y di Reino Hulandes.
Nos ta completamente di acuerdo cu awe e mester sirbi como e ehemplo pa reforma di futuro.
Pero ora ta papia di un ehempel, mester mustra tambe kico no ta un ehempel. Den esaki awe, mr. dr. Rycond Santos do Nacimento, por hunga un papel importante.
Santos do Nacimento, a demostra e curashi di lanta contra un “grupito” den su partido. El a presenta ehempel di nombernan asocia na scandalnan cu ultimo tempo miembronan di su partido a produci.
Su partido, manera semper nos a trece dilanti, mester tabata cuidadoso pasobra su partido a produci e scandal grandi Fondo Desaroyo Nobo San Nicolas, cu a perde su realidad no solamente den olanan di lama na beach di misterio, pero tambe pa e uso di introduccion di BBO, cu a duna Mike oportunidad pa bira Prome Ministro.
Awe Aruba mester di reforma cu ta permiti cu politiconan cu skirbi nan nomber cu letter di oro di dignidad y respet merece, no ta wordo lubida pasobra otro politiconan a deshaci di credibilidad politico.
Unda dignidad politico y concenshi politico ta keda ora Mike a gana eleccion basa riba un promesa cu a haci cu awe, belasting mester suta Pueblo di Aruba cu mester paga debe?
Pakico na 2014, un gobernante di Reino por a baha Prome Ministro di Aruba for di Fort Zoutman? Reforma mester contene cumplimento di e Ley di Contabilidad, cu ta evita e berguensa nacional den cual Mike a sink Aruba.
Ta na e momento aki, na 2014, terenonan di Aruba tabata wordo reparti segun acusacion di Husticia, cu nos ta respeta.
Na 2017 ora e acuerdo cu Citgo cu a causa risa rond mundo a fracasa y Aruba a keda bou supervision, Mike no a haya e 15 asientonan den Parlamento y a despedi.
El a nenga di reforma e Aruba cu el a destrui y atrobe a huy.
El a bolbe ora otro a evita un caos total na Aruba, cu a cuminsa cera conoci cu scandal tras scandal durante su gobernacion.
Awe Aruba mester di reforma pa mira con ta haci cu e debe cu Mike a crea. Aruba mester di reforma pa exigi politiconan di no crea circo den Reino pero defende e dignidad di e Arubiano.
Awe Aruba mester di politiconan, cu no ta permiti nan mes wordo uza como mercado liber cu propiedad di Pueblo manera a pasa den e scandalnan cu gobierno di Mike Eman a produci.
Aruba mester di reforma pa debolbe e Pueblo di Aruba, cu a subi caya, a enfrenta morto pa lucha pa su autonomia pa su Status Aparte, pa e dignidad cu e Arubiano merece.
Esaki ta reforma pa cual nos lo yuda Santos do Nascimento lucha, sea cu e ta den AVP, pafor di AVP.
Reforma ta e formula directamente asocia na e ser humano, cu ta comete eror. E contenido di reforma ta dicidi pa futuro di e pais!
