Opinion Publico:
ORANJESTAD (AAN)- E siman aki na DIARIO a drenta un par di opinion publico, dunando Prome Minister razon y danki, cu por fin a pone un paro na Minister Rudy Lampe, cu como minister demisionario ta sigui mete den asuntonan cu no ta concerni su persona mas, riba tereno di enseñanza.
Ta prome biaha cu un minister di enseñanza ta worde asina rechaza pa un gremio completo manera maestronan, SIMAR, SEPPA y sigur mayornan cu ta mira con nan yiunan a worde afecta cu e decisionnan sin pia ni cabes di Lampe.
Con ta posible cu awo e ta bin cu e idea di pone Enseñanza bao curatela? Ya caba e veld di enseñanza a pasa den circumstancianan fastioso bao maneho di Lampe, y awo cu nan a kere cu por sosega nan cabes un rato den vacacion, ata tin algo otro nobo, cu ta crea malestar cerca nan, pasobra señor Rudy Lampe kier caba cu Aruba su sistema di enseñanza, incluyendo e werksternan di SKOA, cu tambe ta ainda den incertidumbre tanten no tin otro minister di enseñanza, cu ken nan por conta pa al fin soluciona nan problema.
Un Juffrouw a expresa: “manera hende cu ta papia Spaño ta bisa ‘ki flohera!’ Ta na unda e meneer aki kier yega?” Ban spera cu tur e veld di enseñanza por cuminza un periodo escolar nobo cu completamente un otro aire suplando rond, aire fresco, paz y trankilidad y cu lo worde nombra como minister un hende cu di berdad tin enseñanza na pecho, y cu por tuma e decisionnan corecto y den consulta cu veld cada bez cu ta necesario. Asina leu e voznan cu a reacciona riba e tema.
