*Ta bay tin hopi producto fresco!
ORANJESTAD (AAN) –Relacionista Publico di LVV-Santa Rosa, Randy Maduro, den entrevista cu DIARIO a menciona cu e ultimo lunanan, tabata di aprecia y admira tambe, e cunukeronan local.
Maduro a expresa cu e trabao di cunukeronan nunca tabata facil ni por bisa “suave”. Semper e tabata y ta un trabao duro, y LVV ta aprecia y admira locual nan ta haciendo.
“Na momento cu nos extende nan un invitacion pa participa den nos pop-up market, mesora nan ta reacciona y semper di nan banda nan ta keda agradecido pa loke nos, di Santa Rosa, ta ofrece na nan, pa nan por sali di nan producto y esaki, atrobe, ta pa yuda abastece e demanda cu tin aki na Aruba tambe”, Maduro a relata.
El a subraya cu mesora Santa Rosa ta saca su flyers y su informacionnan, mesora e reaccion ta positivo di tur banda, tanto di e productornan local como di e consumidornan y di Santa Rosa mes.
El a señala cu e demanda ta basta grandi y nan Pop up market semper ta exitoso.
“Mi tin cu bisa sigur, cu diasabra awo (5 di juli) for di 8’or di mainta te 11’or, por yega aki na Santa Rosa, atrobe den nos kinderboerderij, nos ta bay tin entre 15 pa 16 di nos productornan local, cu ta bin pa ofrece nan productonan fresco. Sigur bin trempan, pasobra esun cu ta bin trempan ta bebe awa limpi”, Randy Maduro a bisa.
El a reitera cu atrobe e consumidornan por wak e variedad di productonan cu ta wordo ofreci di nan mercado, y elogio so Santa Rosa tin p’esey. Fruta, berdura, carni fresco, etc., pues un ampliacion grandi di nan Pop up market ta bay tin, y e publico di Aruba semper ta sostene esaki.
“Berdad nos ta hacie den nos kinderboerderij, cu ta e cunuco Chavelito, na Papiamento crioyo, y hopi hende ta haya esaki sumamente tremendo. Nan ta gusta e concepto. Y esnan cu ta bin cu nan yiunan, tin algun bestia den Cunucho Chavelito, unda por haci compra y disfruta di e productonan y e chikitonan por wak e bestianan cu tin den e cunuco.
Esaki a trece un dushi ambiente diasabra mainta entre 8’or cu 11’or di mainta”, Randy Maduro a bisa.
