WILLEMSTAD: Turismo a bira e pilar economico mas grandi di Curaçao.
Y den luna di Juni, Minister Cijntje a trece algun futbolista legendario di Hulanda, Brasil, Colombia y Curaçao. Segun Rennox Calmes di Partido TPK (Trabao pa Korsou), sinembargo ta tur hende mester sigui yuda pa atrae mas turista pa Curaçao.
Partido TPK ta mira con Minister Cijntje ta habri caminda treciendo diferente aerolinea nobo pa Curaçao. Un di e strategianan pa mas hende sa di Curaçao y yega e isla como destinacion ta e video cu e peloteronan profesional di baseball.
Segun Calmes, Partido TPK ta mira oportunidad awor pa Minister Cijntje haci loke ta na su alcance pa trece e futbolista Leo Messi pa Curaçao. Messi n’e momento nan aki ta biba na Miami paso el a bay forma parti di e ekipo Inter Miami. Pa e solo hecho aki Messi ta na Miami cual ta un dje partinan di Merca cu Curaçao tin hopi conexion cune, ta pone cu tur wowo di mundo ta riba Miami.
E politico ta kere, cu pesey Curaçao tambe mester haci uso di e oportunidad aki y laga Messi bini Curaçao y uza e momento como uno pa haci promocion na Curaçao, y sigur tur prensa lo bin tras di Messi. Na su opinion, e lo por bira un propaganda grandi pa Curaçao.
E ta un idea valido of no? Pasobra ya caba training a start pa e team di Inter Miami y por lo pronto lo no bay tin chens pa nan hungador contrata pa miyones di Dollar, esta Leo Messi bandona su tereno di wega pa bay promove otro lugar.
