ORANJESTAD (AAN): E punto mas noordoost di Colombia, ta departamento di La Guajira. E ta keda apenas 125 kilometer West-Zuidwest di Aruba.
Y ultimo añanan el a bira e lugar unda narcotraficantenan ta usa su costa pa asina subi lama cu varios speedboat tipo GoFast pa purba hiba droga sea pa Republica Dominicana, Venezuela, Islanan ABC, of Centro America.
Pesey mes, Polisnan di Colombia y hasta Ehercito awor ta patruyando e zona mas y mas. Y un biaha mas informacion ta drenta for di Maicao, cu autoridadnan a logra di pone man riba cargamento grandi di Marihuana.
E ta un golpi grandi pa e financiamento di organizacionnan criminal dedica na Narcotrafico, ora cu un cargamento grandi di como 1.000 kilo di marihuana a wordo confisca den fin di siman. Autoridadnan Colombiano ta calcula cu e 1 ton di droga aki ta duna e gruponan narco un golpi di US$ 260.000.
Polis a para un Truck cu tabata lastrando un freezer trailer cu galiña frozen. E tabata coriendo riba e caminda di Palomino pa Riohacha. E Truck a sali for di Cali y tabata rumbo pa Maicao. Ora di a bay controla e truck, a bin descubri e droga bon scondi.
For di pafo bo ta djis kere cu e ta un Truck cu un cargamento di galiña congela. Pero ora cu a bay check den e parti di e unit di refrigeracion, a bin haya un parti falso den cual tabatin 2.066 paki di marihuana pa exportacion, tipo ‘creepy’, cu un peso di 1.033 kilo.
Polis a cuminza investiga y a haya sa cu ta prome biaha cu e Freezer Truck aki ta drenta den area di La Guajira, y cu su mision tabata pa yega e droga pa un warehouse na Maicao, pa despues bay cune pa area di Alta Guajira, unda e lo wordo poni riba Speedboat tipo GoFast pa wordo hiba otro pais.
E chauffeur Yutber Arley Guzmán Moreno di 31 aña procedente di Villavicencio, a keda deteni. El a wordo pasa hunto cu e droga pa Ministerio Publico.
Di Januari 2021 te cu awor, na La Guajira a logra di intercepta mas di 5 ton di droga (marihuana y cocaina).
{gallery}Polis 1 Ton di marihuana na La Guajira{/gallery}
