POHs-GGZ pa traha cu dokternan di cas ta hopi importante den e casonan di salud mental

Rulienne Arends, trahado preventivo FADA:

*E lo kibra e stigma cu tin 

ORANJESTAD (AAN) – DIARIO a acerca Rulienne Arends, Trahado Preventivo di Fundacion Anti Droga Aruba (FADA), y a puntr’e kico ta nifica pa FADA cu ta bay haya POHs-GGZ, pa asisti dokternan di cas pa casonan di salud mental.

Rulienne Arends a indica cu esaki ta un parti mas di loke ta salud mental y esaki ta cuminza kibra e stigma cu tin. Esaki e ta mire como algo hopi importante, pasobra e prome caminda pa bati ora un persona ta sinti señal di un desbalansa ta docter di cas.

“Den e caso aki, kico miho cu tin un persona specializa cu por atende bo di biaha. E sa cu tin hende cu ta bisa cu semper cu busca ayudo tin lista di spera, e tin cu warda pero e no kier warda mas. Esaki ta un forma cu e pashent no tin cu warda pasobra tin un persona cu por atend’e di biaha, riba cualkier señal”, Rulienne a indica.

El a agrega cu FADA mes tin experiencia cu un POH GGZ, cu tambe a haci opleiding cu nan, anteriormente, y nan por a wak e fruto di esaki unda cu na momento cu e haya un persona cu e tin cu “verwijs door”, e ta tuma contacto di biaha.

“El a tuma contacto cu nos mes, di biaha, cu un caso di un hoben cu por a haya algun sesion di motivacion. Ta bay bin cinco persona cu aworaki ta hayando e oportunidad aki, y mi ta kere ta algo hopi clave den loke ta salud mental”, Rulienne a señala.

El a reitera cu ayudo di POHs GGZ ta bay yuda un tiki mas pa kita e miedo y berguenza y trece un tiki mas d confianza cerca e persona cu mester di e yudanza, y esaki ta e partinan cu FADA ta scucha hopi. E parti di lista di spera ta keda un muraya cerca hopi hende, nan kier busca nan mes alternativa, e ora ey.

“Di loke nos a wak tiki, tiki esey ta cambiando, no ta caminda cu nos desea pa e ta, pero el a cuminza, manera nos ta bisa, den ‘baby staps’ pero ya ta cambiando caba”, Arends a relata.