Poblacion di Aruba ta consisti di mas hende muhe cu hende homber

Durante Censo2020 a conta un total di 108,166 persona - *Durante e ultimo 10 aña, e poblacion a crece cu 6,6%

ORANJESTAD (AAN): Oficina Central di Estadistica (CBS) ta informa e pueblo di Aruba cu entrante e siman aki lo cuminsa publica e resultadonan di Censo2020. 

            Resultadonan a wordo parti den 8 topico y lo wordo presenta pa medio di un videoclip informativo. Pa fin di e luna aki, CBS lo presenta e buki di resultadonan di Censo2020 den un formato digital. Esaki lo ta disponibel pa publico riba e website di CBS.

            E prome video ta trata e topico di poblacion. Cuanto persona a wordo conta durante Censo2020? Ta compara resultadonan di Censo2020 y Censo2010 pa asina por indica si tabatin un cambio den e ultimo 10 aña.

           Cuanto nos ta? 

            Durante Censo2020 a conta un total di 108,166 persona cu ta representa un crecemento di 6,682 persona den comparacion cu Censo2010. Esaki ta nifica cu den e ultimo 10 aña, nos poblacion a sigui crece aunke mas poco poco cu den e decadanan anterior.

            Durante e ultimo 10 aña, e poblacion a crece cu 6,6%. Esaki kiermeen tambe cu e densidad di nos poblacion a sigui subi. Mientras cu durante Censo2010 tabata tin 564 persona pa cada kilometer cuadra, durante di Censo2020 a conta 601 persona pa cada kilometer cuadra.

            Nos poblacion ta consisti di mas hende muhe cu hende homber. Hende muhe ta representa 52,8% di e poblacion y hende homber 47,2%.

            E edad mediano di e poblacion ta 42 aña, esaki ta 4 aña mas compara cu Censo2010. Edad mediano di hende muhe ta 43 aña y di hende homber 40 aña.

            Actualmente, e grupo mas grandi di nos poblacion ta consisti di persona adulto entre 18 y 64 aña di edad. Nan ta representa 62,8% di nos poblacion. Compara cu Censo2010 e grupo aki a conoce un aumento di 4,3%.

            E di 2 grupo mas grandi ta mucha y hoben entre 0 y 17 aña di edad. Nan ta representa 21,2% di nos poblacion. Compara cu Censo2010 e grupo aki a conoce un caida di 10,9%.

            E grupo mas chikito di nos poblacion ta consisti di adultonan mayor, esta personanan di 65 aña of mas. E grupo aki ta representa 16,0% di nos poblacion y compara cu Censo2010 a conoce un aumento substancial di 63,0%. Den otro palabra, e poblacion di Aruba ta consisti mas y mas di personanan di 65 aña of mas. 

Pasobra Aruba a conta! 

Pa mas informacion por bishita nan website www.census2020.aw of nan pagina di Facebook: Central Bureau of Statistics Aruba