Ploegnan a uni forsa pa adelanta trabao di limpiesa den cuadro di Cuida Aruba

ORANJESTAD (AAN): Den preparacion pa e Dia Nacional pa Cuida Aruba di awe Diasabra 29 di augustus, trabaonan di limpiesa ya a cuminsa den diferente parti di isla.

  Ya durante Diabierna, ploegnan di Bureau City Inspector (BCI), Departamento di Obra Publico (DOW) y Serlimar a uni forsa pa adelanta trabao den varios area y banda di camindanan principal.

   E accion ta forma parti di e esfuerso nacional pa Cuida Aruba, cu ta busca no solamente atende desperdicio, sino tambe crea un movimento mas amplio di cuido y responsabilidad pa nos espacionan publico.

   Durante e accion di Diabierna, trabao a tuma luga na un total di 13 localidad: Maria Maai, Siribana, area di Super Food, Palm Beach, Rooi Prikichi, Koeriboeri, Ayo, Green Corridor riba Sero Tijsji, tambe Mahuma pa Sero Tijsji, San Fuego pa Yamanota, Weg Kustbatterij, Rooi Brazil, y Sero Biento.

   Cada localidad tabata conta cu supervision di un opzichter di DOW, BCI of Serlimar, como parti di e coordinacion entre e diferente instancianan.

   Na Siribana, Mirella Landscaping a forma parti di e ploeg cu a sigui cu trabaonan di limpiesa den e area. Den Ayo/Santa Lucia, Ploeg Tavares tambe a pone man na obra, mientras cu otro ploegnan a sigui atende e diferente localidadnan programa.

   E movemento cu ya ta visibel den diferente parti di Aruba ta ilustra e meta mas amplio di Cuida Aruba: uni capacidad y esfuerso di diferente instancia pa atende nos medio ambiente y mantene e isla limpi.

Prome Minister Mike Eman ta considera e cooperacion aki un parti importante di e cultura cu Gobierno kier sigui stimula rond di Cuida Aruba: cu cuido pa nos isla no ta limita na un solo dia, sino mester bira un responsabilidad comparti y continuo.

   E trabaonan di Diabierna a sirbi como adelanto pa e Dia Nacional pa Cuida Aruba di awe Diasabra 29 di augustus, ora e esfuerso lo sigui na escala nacional cu diferente punto di deposito disponibel pa comunidad. Pa mas informacion di localidad nan di desperdicio, por subi riba e website: Cuidaaruba.com

Gobierno ta gradici e diferente ploegnan y instancianan cu ta poniendo man na obra y ta invita comunidad pa sigui contribui na e meta comun: un Aruba mas limpi, cuida y agradabel pa tur.