ORANJESTAD (AAN) Recientemente Plataforma Educacion y Labor (PEL) tabatin un reunion hopi inspirado cu Aruba Wine and Dine Hospitality Group.
Den esaki nan a discuti e ultimo desaroyonan, e.o. e consecuencianan pa educacion y e mercado laboral, y a explora formanan significante di colabora pa logra un impacto.
Hunto nan a comparti ideanan riba con por conecta miho cu e studiantenan pa nan haya berdadero experiencia laboral, fortalece e sistema di mentor den sector hotelero, y crea asociacionnan sostenibel cu ta apoya tanto e empleadonan y e futuro profesionalnan.
Door di traha man den man cu negoshinan cu vision pa futuro manera Aruba Wine and Dine, nan ta dal pasonan importante dilanti pa fortalece e sistema di enseñanza na Aruba, y prepara un forza laboral futuro cu ta bon cualifica y motiva pa Aruba.
Nan ta spera di por comberti e combersacionnan den accionnan, pa e bon di studiantenan, e companianan, y pa henter e isla.
