Un Reino den suspenso en espera di un declaracion oficial awe
*Maneho enfrente paisnan di Reino den Caribe ainda den nubia
*Wilders ta bay dirigi accion den Parlamento cu hopi cara nobo
ORANJESTAD (AAN) — Tur indicacion tabata ayera na ciere di e edicion di awe di DIARIO, cu Hulanda tabata para na entrada di un epoca gubernamental nobo y cu awe oficialmente e anuncio lo wordo haci di e logronan pa forma un Gobierno nobo.
Un Gobierno Hulandes, cu sigur a nace bou circumstancianan hopi diferente cu Gobiernonan na ta nace generalmente.
Kende lo bira Prome Ministro den e Gabinete nobo cu lo goberna Hulanda pero tambe lo ta base pa Gobierno di Reino?
Nomber di Ronald Plasterk wordo menciona. Ta trata aki di un cara conoci pa Aruba pasobra e tabata e Ministro di Relacionnan den Reino Hulandes, cu a baha Mike for di Fort Zoutman y a bira instrumental den exigencianan nobo di Reino pa calidad di gobernacion na paisnan Hulandes den Caribe, riba tereno financiero.
E ambiente den cual e desaroyo di e formacion di Gobierno nobo di Reino a tuma lugar, ayera sigur a wordo caracterisa pa e asunto mas importante cu Plasterk mes mester a atende, cu tabata pa alcansa paz atrobe entre su persona y Omtzigt, e politico di e partido nobo cu a kere cu e lo gana eleccion pero no a tene na consideracion cu Hulanda a prefera e opcion di Geert Wilders.
Ta e realidad di e resultado di eleccion Hulandes pa Aruba, awe ta bira mucho mas interesante, pasobra te awor por a scucha informacionnan tocante e condicionnan di bida di e Hulandes biba na Hulanda y medidanan cu lo tuma pa evita mas peso pa e poblacion Hulandes.
Pero kico lo ta e exigencianan pa Aruba y pa Arubianonan cu ainda ta kere cu na Hulanda un bida nobo lo ofrece mas oportunidad?
Condicionnan di bida lo mester mehora na Hulanda segun promesanan di e politiconan. Wilders cu lo no bira Prome Ministro, ta keda e politico cu a percura pa e resultadonan espectacular di eleccion na Hulanda.
Kico su exigencianan pa relacionnan entre Aruba y Reino lo ta realmente, no a bini dilanti. Exigencia di bon gobernacion sigur lo ta parti di loke e lo presenta na un forma comodo ya cu su posicion den Parlamento di Hulanda lo haci cu e ta keda cu un libertad di lanza su ideanan den Parlamento, sin e responsabilida di gobernacion cu e resultado di eleccion na Hulanda realmente a contene pa su persona.
Awe pues por spera cu Aruba ta habri cu un Gobierno nobo di Reino y cu informacion concreto, pa kico Aruba mester ta prepara pa atende na e otro banda di mesa di dialogo y accion den Reino Hulandes, cu mester drenta e etapa final di formacion, cu ta e stipulacion kendenan lo ta Ministronan!
