Otro siman lo present’e na Conseho di Minister:
ORANJESTAD (AAN) Manera ta conoci y DIARIO a elabora riba esaki, Diaranzon 15 di Mei, atardi, Gobierno a convoca un conferencia di prensa extraordinario, den cual Minister di Labor, Energia y Integracion, a duna un actualizacion tocante e situacion di coriente na Aruba, actualmente, y a papia tocante e reunionnan y decisionnan cu a wordo tuma.
E dignatario a sigui argumenta cu biaha pasa cu tabata tin un problema na WEB Aruba NV , gobierno a instrui un oficina di investigadornan experto di Washington DC, MPR, pa bin haci investigacion y recomendacionnan, y a actua. “Nos ta pone nos confianza den WEB y su profesionalnan, hunto cu MPR pa implementa e solucionnan y boso a weita cu e situacion a drecha na WEB”, Minister Glenbert Croes a señala.
Minister a informa cu Diahuebs e expertonan di MPR a yega Aruba, pa inicia e investigacion hunto cu e expertonan di NV Elmar, pa bay constata kico ta e problema, kico ta e solucionnan y den un siman mester cuminza cu e plan pa remedia e problemanan aki.
“No por ta posible cu awe, despues di e rueda di prensa aki, cu tin chens cu coriente ta bolbe bay. Ni un caminda coriente mag bay awenochi ni mañan. Pueblo tin derecho riba suministro di coriente y awa confiable. Biaha pasa tabata WEB y el a responde. Nos ta confia cu e biaha aki Elmar tambe lo responde hunto cu su profesionalnan pa nos actua”, Minister Glenbert Croes a reitera.
E dignatario a bisa cu alavez daño ta wordo haci na pueblo, pasobra ora cu coriente bay esaki ta afecta hogar, famia, economia, henter un pais. Hopi famia ta perde aparatonan electrodomestico manera frishider, etc., cada bez cu coriente ta bay, y aunke e ta spera cu lo no tin mester di uza e compensacion aki, toch ta necesario pa bin cu ne.
“Y mi lo ta trahando riba un plan di compensacion pa pueblo, unda cu lo mi ta haciendo un propuesta proximamente na Conseho di Minister, nos ta instala un comision pa defini e plan, pasobra e realidad tambe ta cu no por t’asina cu nos ta calma pueblo cu excuse; no por t’asina cu nos ta calma pueblo cu un splicacion, no por t’asina cu ora algo asina pasa, mi ta asumi responsabilidad pa e solucion. Mi ta exigi un solucion cu accion, y tur loke mester pa implementa esaki nos ta pone disponible. Entre otro, e medionan financiero necesario y expertonan internacional, brindando e confianza na nos empresanan estatal”, Minister Croes a subraya.
El a vocifera cu e ta un minister cu ta kere den WEB y ELMAR y Utilities, mescos cu e ta kere den tur e profesionalnan di NVnan di Gobierno.
