Integracion por causa interupcion di coriente
ORANJESTAD (AAN): Manera ta conoci, na luna di Augustus 2021 na WEB Aruba NV a implementa IGMS, ‘Intelligent Generation Management System’ (IGMS) pa regula suministro di coriente automaticamente. E tempo ey a integra tur WEB su unidadnan di produccion di coriente y energia den e sistema IGMS.
Awor cu planta di motornan RECIP IV ta den operacion, tabata djis falta un cos! Pues falta pa integra esaki tambe den IGMS.
Riba Social Media di WEB Aruba NV, a tuma nota cu desde siman pasa a cuminza haci trabaonan preparatorio pa introduci diferente test. E integracion mes lo sosode durante siman di 12 pa 19 di september 2022. Durante e proceso, clientenan lo por experencia interupcion di coriente. Ta tuma tur precaucion debido y ta alinea pa minimalisa e interupcion aki.
Hunto cu IGMS lo implementa e sistema ILS, ‘Intelligent Load Shedding’ pa evita cualke interupcion grandi di coriente. Tur esaki ta necesario pa optimalisa suministro di coriente.
Aunke WEB Aruba NV no ta premira interupcion, ta pidi comunidad di Aruba comprension en caso cu surgi interupcion di coriente den e simannan venidero. Ta enfatisa cu lo haci tur posibel pa minimalisa e interupcionnan aki. Di antemano ta pidi disculpa pa inconveniencia cu por surgi, debi na e trabaonan necesario di integracion.
IGMS y ILS ta forma parti di e combinacion di proyecto y inversionnan cu WEB a bin ta haci pa por ofrece awa y coriente na un manera confiabel, pagabel y sostenibel. Implementacion di IGMS ta un logro mas den e esfuersonan di WEB pa cumpli cu su vision di ta ‘Greener, Cleaner and Fuel Oil Free.’ E potret di e Control Room pa cortesia di WEB Aruba NV.
