Un analisis di puntonan central den relato Presidente di Parlamento
*Trabou como Parlamentario no por bira “fast money” den un circo
*Codigo di conducta pa e representacion constitucional di e Arubiano
ORANJESTAD(AAN)—Wega cu e realidad di un Parlamento, a bira hobby sigur di cierto grupo cu ta uza democracia pa haya voto y asina crea un revolucion constitucional, cu ta conduci na e cambio di gobierno cu ta permiti nan partido haya mando.
Durante e ultimo añanan mas y mas, por a mira con e maximo representacion di Aruba cu Betico Croes a comberti den e centro di bataya pa Aruba alcansa Status Aparte, a sigui perde su calidad pa motibo di wega politico.
E motibo di empeoramento di e calidad di Parlamento, sigur ta debi na e pasion di e partido mas grandi di oposicion, pa baha Gobierno den uno di e situacionnan mas tristo cu historia politico di Aruba a conoce, cu ta presencia di Benny Sevinger den Parlamento.
Na vispera di e aña nobo di Parlamento, ta bini dilanti e plannan di Presidente mr. Edgard Vrolijk pa loke nos por yama “reformacion di Parlamento” na un momento mundial crucial.
Pa por analisa plannan pa funcionamento di Parlamento, mester comprende cu e futuro di Aruba, e generacion nobo di Aruba, ta depende di e calidad di Parlamento di awe.
Historia di Parlamento durante Siglo21, ta mustra claramente con e representacion constitucional di e Pueblo di Aruba, a zink den e olanan bruto di oposicion na servicio di partido politico.
Si awe Aruba tin un debe nacional, tin debenan di PPS cu ta stroba inversion debido na e realisacion di un futuro nobo pa e generacion di futuro, ta pasobra Parlamento di Aruba durante Gobierno Mike Eman a deshaci di su Derecho di Budget pa entrega Mike Eman y Benny Sevinger e suma di 1.6 Biyon pa nan fiesta.
Ta e mayoria absoluto di AVP den Parlamento, e contracto cu Citgo, cu a haci cu Aruba cu a wordo hinca den e aventura misterioso cu Nicolas Maduro pa sconde e desastre financiero cu nan partido a sostene ocho aña largo.
E realidad di mayoria absoluto den Parlamento durante dos Gobierno Mike Eman, a haci cu awe Aruba tin reserva grandi enfrente un mayoria absoluto pa un partido, manera combersacionnan cu Pueblo di Aruba lo trece dilanti.
Transparencia ta e palabra importante cu ta bini dilanti den e plannan di mr. Edgard Vrolijk.
Un transparencia cu no ta posibel den un circo bergonzoso cu Oposicion a crea y cu hasta a circula riba Facebook pa presenta e Parlamento di Aruba como hilaridad.
Concepto di Leynan importante cu ta yega Parlamento, no ta haya oportunidad pa bira conoci pa Pueblo y asina haya transparencia den un situacion di circo.
Nan ta bira obheto pa haci politica sigur di parti di Oposicion cu a sigui baha su nivel no solamente cu presencia di Benny Sevinger.
Antes no tabata tin tanto hende cu estudio academico den Parlamento pero si mucho mas tanto Arubiano cu a tene na nan bon educacion di cas y cu mucho mas amor y concenshi pa Aruba, cu ta paga Miembronan di Parlamento pa haci e trabou pa cual nan ta wordo bon paga.
Nos ta aplaudi e informacion di mr. Edgard Vrolijk cu a logra atende loke a drenta Parlamento pa atende.
Central pa nos ta keda, sinembargo, con cierto Miembronan di Parlamento mes ta kibra e balor democratico di Parlamento, cu no ta centro di benta di interes personal pa hende cu no kier traha of kier entrada na forma facil.
E Codigo di Conducta y Reglament van Orden nobo riba cual mr. Edgard Vrolijk ta traha, sigur tin nos sosten total y pa nos hasta ta e prome puntonan cu mester haya atencion.
Parlamento no ta un centro pa gana “fast money” manera awe hende lo por conclui ora mira e sumanan cu Pueblo di Aruba ta inverti den politiconan cu ta drenta Parlamento caminda no solamente nan ta Sirbidor di Pueblo, pero nan ta gosa di e oportunidad di bira “super hende”, bira miembro di sociedad.
Mester deshaci di e posibilidad pa un acusado ta Miembro di Parlamento mescos cu tur ciudadano cu haya nan mes den problema cu Husticia, ta wordo suspendi di nan trabou.
En corto! Nos ta sostene e logronan di mr. Edgard Vrolijk pero pa nos awor loke tin prioridad ta, cu ora e mucha cu ta futuro di Aruba, tende e palabra “Parlamento” y “Miembro di Parlamento” e conceptonan mas halto di moral, dedicacion y amor pa su pais, yena su bista riba e futuro den cual e lo ta adulto.
