Plan y presupuesto pa 2024 di ATA ta inclui diversification di mercadonan

Minister Dangui Oduber  

ORANJESTAD (AAN):   Diamars merdia oficina di turismo a haci entrega y a duna un presentacion di e plan y presupuesto di Aruba Tourism Authority pa aña 2024 na Minister di Turismo sr. Dangui Oduber.     Esaki a tuma luga den Cocolishi den presencia di e CEO Ronella Croes y miembronan di board di A.T.A.

            E plan y presupuesto pa 2024 ta inclui diversification di mercadonan, unda a presenta cu e mercado di Norte America ta uno stabil y entre otro e mercado di Latino America ta uno cu lo bay crece.         Strategianan ta demostra tambe riba e desaroyo di e mercado Suizo.    

            E 'corporate plan' ta demostra cu e modelo di desaroyo turistico di “High Value – Low Impact” ta ilustra kico a wordo haci y tambe kico lo sigui haci riba area di:  

1. contribucion economico 
2. brinda nos bishitantenan un experiencia di calidad halto  
3. demostra e importancia di calidad di bida di nos habitantenan y poniendo atencion na proteccion di nos naturalesa y medio ambiente.  

                E presupuesto como tal ta inclui colaboracion cu entre otro Aruba Excellence Foundation, Aruba Hospitality & Security Foundation & Fundacion Parke Nacional Aruba, invirtiendo asina aki den nos servicio y hospitalidad pa medio di entrenamento, un Aruba sigur y proteccion di nos naturalesa y medio ambiente.    

            Minister D. Oduber su maneho ta pa enfoca ariba e calidad y no cantidad di bishitantenan y e indicador di mas importante pa midi e calidad ta e tourism receipt. E tourism receipt lo conoce un aumento di 6% na aña 2024 vs aña 2023.

            E enfoke lo sigui ta riba e trabou di posiciona Aruba internacionalmente y guia nos comunidad na un manera duradero y sostenibel pa medio di proyectonan menciona como investigacion y conseho nan di nos partners di turismo.