ORANJESTAD (AAN) — Uno di e topiconan di momento sigur ta e Plan di Rescate di Mike Eman.
Cu hilaridad por constata cu Aruba pronto un biaha mas lo por presencia e storia di Aladin, cu despues di a sconde pa casi 4 ana, derepente e ta bin rescata Aruba, cu un plan di reconstrui economicamente e pida barranca aki.
El a lubida cu e definicion di rescata, den bukinan ta nifica libera un persona secuestra of reteni contra su boluntad. Por rescata un lugar invadi of conquista dor di un persona, un enemigo a cambio di placa of mediante di forza.
Pueblo kier recorda Mike cu Aruba pa di prome no a ser secuestra. Gobierno a haya e poder pa goberna dor di cuidadanonan inteligente, cu a sa di scoge kende nan kier pa trese e cambio anhela.
Ningun momento cuidadanonan a wordo retene contra di nan boluntad.
Hilaridad sigur ta wordo provoca ora scucha personanan cu ta puntra nan mes si Mike ta bao di impresion cu e gobierno actual NO por ta diferencia den e sistema cu su partido a hiba cu placa y ta hasi uso di forza strategico riba mente di e pueblo pa mantene nan oprimi.
Bo no por recata loke bo mes a bira lomba pe, bo mes a bandona, ta e mensahe cu Pueblo ta manda pa Mike.
Mike Eman kier renoba Aruba cu ainda ta puntra su mes kico a pasa cu Miyones cu a wordo inverti pa medio di su vision di ayera.
- Green Conference cu a costa capital pa sinta na mesa cu Richard Branson.Kico a sali for di esaki?
- Trece austronauta Wubbo Ockels cu su barco Ecolution cu a costa 1.5 miyon pa e por permanece 3 luna y yuda Aruba cu un plan di innovacion. Kiko a para di esaki?
- E programa Bo Aruba, cu ta encera 10 projecto y lo mester involve 241 sub projects na un balor di 1,6 biyon. Ta increibel cu miembronan di Parlamento di AVP a entrega Gobierno Mike Eman Un Miljard cut and clear. Awor e ta bay ronoba loke el a laga atras como desastre?
- Of renoba e cantidad di propiedad beachfront na Colony cu lo ta na nomber di un grupo privilegia? Tin un green community traha den exclusividad pa seguidornan?
Arubianonan ta puntra nan mes kico Mike Eman awe kier reconstrui, si ningun hende cu mente na su lugar lo kier traha cu Mike, cu kier ciega cu baile y sunchi hende y ta grita manera alma malo.
Tin pensamento cu den su buki reconstruccion ta campa bao di un palo dilanti cas di gobernacion, baña y come den sala di Parlamento ora tur hende ta drumi y laga pueblo carga cu e consecuencianan.
Palabranan di Mike ta cay duro pa e Pueblo cu el a atras den estado di destruccion y cu awe e kier bolbe haya na su banda pa e por bolbe na e dushi bida cu durante dos termino di Gobierno e por a saborea.
