ORANJESTAD (AAN) – Parlamentario y lider di Fraccion di MEP, Rocco Tjon, a hiba palabra den conferencia di prensa den cual el a elabora riba e tema di maneho migratorio.
Parlamentario Tjon a señala cu e ta toca e tema aki pasobra opositornan politico ta haciendo promesanan falso riba e tema, locual tin di haber cu e campaña politico cu tin aworaki, anto e ta haya necesario pa duna un splicacion tocante esaki.
Na prome lugar, el a bisa, e programa di partido MEP ta publica y tur hende por lesa exactamente kico ta e meta y e vision pa e siguiente cuater añanan, y specificamente pa loke ta concerni e maneho migratorio.
“Mi ta kere cu mester introduci un maneho migratorio husto y mi lo splica kico esaki ta encera.
E no ta na su lugar cu aworaki politiconan opositor di e Partido AVP ta haciendo promesanan falso, unda na esnan tin un necesidad aworaki, entre otro, di trabao pero tambe riba permiso y passport. Mi ta kere cu esaki ta algo di condena y completamente robes.
E ta asina cu procesonan lo ta mas transparente y mas habri, unda e aplicante mes tin control riba esey tambe. Pesey, ta importante pa splica kico a wordo haci e ultimo dos añanan, y cu lo cristaliza na Augustus di e aña aki”, Parlamentario Rocco Tjon a señala.
El a agrega cu den cuadro di tur e procesonan aki, tur e problemanan cu esaki ta trece cune pa esnan cu ta haci aplicacion, entre otro permiso, tin un proceso specifico cu ya a cuminza na 2019, y cu lo culmina na Augustus venidero.
“Esaki ta un colaboracion entre Ministerio di Husticia y e Ministerio di Asuntonan General; pasobra den cuadro di e vision di Gabinete Wever-Croes, pa introduci e proyecto di E-Government, practicamente pa henter e aparato publico, a bin cu un maneho specifico y a haci e introduccionnan necesario tambe, den e caso aki na DIMAS, pa core yega agiliza e procesonan di peticion pa permiso”, Tjon a informa.
El a bisa cu na mesun momento, e procesonan aki ta fortifica e integridad door di introduci procedimentonan mas transparente, unda e aplicante of persona cu kier yega na un permiso, e mes por sigui henter e proceso.
“Anto, kico esaki lo nifica? E lo nifica cu nan ta habri e sistema completo pa publico, cada ken cu aplica ta bay haya un ‘user ID’ y na mesun momento e posibilidad di loke nan ta yama ‘tracking’. Kiermen, abo mes como aplicante por duna siguimento unda bo peticion ta, di con e ta tarda, cu permisonan, por ehemplo, ta wordo duna despues cu e temporada ya caba a vence. Pero e parti di mas importante, den mi concepto ta, cu tur pago lo bay sosode online”, e parlamentario a subraya.
Tjon a indica cu esaki ta haci e parti di corupcion no imposible, pero e por wordo bringa fuertemente, y unda cu un hende ta paga (bao di mesa) pa permiso, lo keda den pasado.
Parlamentario Rocco Tjon a splica cu e peticionario por aplica directamente via e portal, y e aplicacion ta drenta den proceso mesora, pa asina por garantiza cu e cliente ta haya contesta den e terminonan stipula.
Segun Tjon, ora di wak e practicanan di oponentenan politico ta parce cu nan ta contra e procesonan transparente aki y e fortificacion di e aspectonan di integridad, pasobra nan kier pa abo keda depende di nan pa un fabor politico.
“Pa e proyecto aki cu ta drenta na vigor na Augustus venidero, ya caba tin un proyecto piloto a wordo encamina, y nan a saca tur e foutnan for di dje, y aworaki el a wordo habri pa publico henter.
Si abo no mester, ni kier, pasa door di un politico of ambtenaar pa fabornan politico, esaki ta un manera hopi mas husto y mucho mas transparente, unda bo no ta depende mas di un fabor politico” Parlamentario Rocco Tjon a reitera cu enfasis, finalmente.
