Voortgezet Ouderschap ta casi Ley ---- ORANJESTAD (AAN): Dia 4 di October 2021, Ministerio di Husticia y Asuntonan Social a ricibi e Plan di Mayor den su forma di preparacion pa complimenta den un Ley.
E documento pa cu e ley” Ontwerp landsverordening houdende wijziging van Boek 1 van het Burgerlijk Wetboek van Aruba (AB 1989 no. GT 100) en het Wetboek van Burgerlijke Rechtsvordering van Aruba (AB 2005 no. 34)” den relacion cu e promocion di paternidad continuo despues di divorcio, lo wordo yama LEY DI PLAN DI MAYOR OBLIGATORIO.
E rapport entrega na Minister di Husticia y Asuntonan Social, ta un compilacion di tur e preguntanan por escrito ricibi for di e miembronan di tur e fraccionan di parlamento di Aruba riba e Ley di Plan di Mayor Obligatorio.
Kizas e ta un ripiticion di compilacion, debi quizas cu e miembronan di parlamento no tawata presente durante e presentacion cu comision Voortgezet Ouderschap a duna dia 10 di Mei 2021 na e comision Social di Parlamento, of quizas ta debi na e hecho cu awor Staten ta conta cu miembronan nobo di parlamento.
Michella Steenvoorde-Laclé den su capacidad como presidente di comision Voortgezet Ouderschap, ta splica cu for di su funcion como consehero di Minister di Husticia y Asuntonan Social, ta su tarea primordial pa tene Minister al tanto di e contestacionan y ponencianan. E control prome pa yega na e documento aki no ta solamente di e comision di Voorgezet Ouderschap pero tambe di Directora di Sociale Zaken, y e Directora di Directie Voogdijraad cu ta pasa sigur riba e preguntanan y ponencianan y ta duna nan comentario.
Una ves cu ta manda e contestanan, nan ta wordo controla y revisa door di professor Jan de Boer kende ta e persona cu a skirbi e ley pa Aruba y sra. Ilona Sneek representante di Directie Wetgeving y Juridische Zaken cu conhuntamente ta traha e "nota naar aanleiding van het verslag" cu oficialmente ta wordo traha pa DWJZ.
Y asina e circulo ta yega na su final y ta ser entrega na Minister di Husticia y Asuntonan Social, drs. Rocco Tjon.
‘Plan di Mayor’ ta pa regula cu mayornan cu separa, por comparti responsabilidadnan pa cu nan yiunan y hunto cu esaki ofrece mediacion familiar preventivo. E gobierno aki ta boga pa prevencion na tempo, pa asina detecta posibel problemanan na tempo y referi na ayudo adecua.
Entre otro e mayornan ta yega na acuerdo cu ta na bienestar di nan yiunan menor di edad pa despues di divorcio nan sigui eherce conhuntamente e autoridad paternal riba nan yiunan cu respet mutuo. Na unda e kinderalimentatie ta bon regula y tur leynan ta wordo sigui pa cu e mucha su seguridad y bienestar.
For di e Tratadonan Internacional di Mucha e yiu(nan) tin derecho pa tin contacto y relacion cu e mayor cu no tin e cuido diario. Esaki despues di divorcio mayoria bez ta bay no di un manera amistoso na unda ta perhudica e mucha den su crecimento y den su actitud.
E comision cu ta traha riba Cie. Voortgezet Ouderschap ta presidencia door di Michella Steenvoorde-Laclé, Beleids Adviseur Ministerio di Husticia y Asuntonan Social. Secretario Bert Wielenga, waarnemend directeur Centro Otropedagogico Aruba. Miembro fiho Aisca Berkemeyer, Directora Departamento di Voogdijraad.
