Pius X School ta gradici Prome Ministro y Parlamentarionan pa nan bishita

Relaciona cu instalacion di eBoards,

ORANJESTAD (AAN): Manera cu DIARIO a trece caba den edicion di Diaranson, relaciona cu instalacion di eBoards na Pius X School na Dakota, Prome Minister Evelyn Wever-Croes, hunto cu Presidente di Parlamento Edgard Vrolijk y Parlamentario Hendrik Tevreden a bishita e scol diamars mainta. Pius X School ta un di e scolnan cu tambe a gana e proyecto di Edutech. En total e scol por a cumpra 7 eBoards y pa completa cu tur e 9 klasnan haya eBoards, WEB Aruba NV a sponsor 2 eBoards.

   Cabesante di Pius X School, Juffrouw Sheila Tromp, den nomber di e scol a gradici e mandatarionan pa nan bishita pa no solamente wak kico e scol a logra den a area di innovacion y e fondo cu nan a ricibi di e Proyecto di FUTURA, pero tambe pa asina haya un bista di tur loke e scol ta brinda nos muchanan den enseñansa y e avansenan pa haci enseñansa dinamico pa asina trece cada biaha e miho pa nos muchanan. Juffrouw Tromp ta gradici tambe FUTURA pa e bunita proyecto.

   Prome Minister Evelyn Wever-Croes ta gradici Presidente di Parlamento Edgard Vrolijk y Parlamentario Hendrik Tevreden kendenan sigur, como parlamentarionan, tin progreso di enseñansa como prioridad. Ambos Parlamentario a gradici Prome Minister y Pius X School pa e oportunidad pa bishita e scol y mira e avansenan den innovacion y modernisacion den enseñansa na Pius X School.