Piscado a salba su mes door di tira flare riba lama pabao Corsou

E no tabatin radio ni celular abordo

ORANJESTAD (AAN): Un situacion di emergencia a wordo resolvi Diahuebs siman pasa riba Lama Caribe, danki na e hecho cu un piscado tabatin un tipo di vuurwerk cora yama ‘flare’ cu bo por tira pa alerta hendenan den vecindario di un emergencia.

   Tabata Diahuebs cu Centro MOC (Centro di Operacion Maritimo) di Wardacosta a ricibi un yamada di un persona kende a caba di mira un señal di ‘flare‘ riba lama pabao di Corsou, den becindario di Playa Santa Cruz.  A base di e yamada aki, Centro MOC a dirigi e avion Dash-8 di Wardacosta pa e area cu a nota e ’flare’ pa evalua e situacion.

   E avion Dash-8 ta dispone di camera sofistica di FLIR cu por detecta hende hasta den anochi.  Y nan a bin topa berdad riba lama, un boto cu un homber abordo ta zwaai pa yudansa. Despues cu e boto aki a keda detecta, Centro MOC na su turno a manda un boto di reaccion rapido tipo Metal Shark na e lugar pa duna asistencia.

   E Metal Shark asina a yega rapido den e area, y a topa cu e boto cu un outboard engine defecto, y un persona local abordo.  Nan a dicidi na tira un cabuya pe, y asina a lastra e boto bek rumbo pa boca di Santa Cruz, cu ta situa parti casi full Noordwest di e isla, mey-mey di Boka Hulu y Playa Lagun.

   Vocero Shalick Clement di Wardacosta, a hiba palabra.  E dama a splica cu den e situacion di emergencia aki e ‘flare’ cu tabatin abordo a resulta esencial. E homber piscado a uza esaki pa hala atencion di personanan na tera pa laga sa cu e tabata den un situacion di emergencia. Den un situacion di emergencia, un ‘flare’ por ta un di e ekiponan importante pa hala atenshon di hende of otro botonan den becindario ora cu otro medionan di comunicacion no ta disponibel na e momento ey abordo.

   “Wardacosta ta conseha tur doño di boto pa mantene nan boto regularmente.  Percura pa bo tin suficiente ekipo di siguridad y rescate abordo manera: salbabida, ‘flare’, flashlight, kit di prome asistencia, suficiente awa, aparato di paga candela, VHF Marine Radio, y un telefon celular carga. Evita cu bo boto ta daña na caminda y cu bo tin un situacion peligroso riba laman cu bo boto y bo pasaheronan. Den caso cu bo mester di yudansa, bo por tuma contacto cu Wardakosta riba VHF Marine Radio canal 16, of yama e number di emergencia 913, of manda un mensahe via WhatsApp na (+5999) 510-0913.”

   Riba e potret aki saca for di e avion Dash-8, por mira e piscado den e boto sperando yudansa.