Piscado a bay dal den chapaleta y perde su bida na Fuik

Caso na Corsou

WILLEMSTAD: Tabata Diasabra merdia cu Wardacosta di Caribe Hulandes a ricibi notificacion cu un boto di piscado cu tabata nabega riba lama di Fuikbaai, pa un of otro motibo a bay dal cu velocidad halto contra e barancanan, y a keda pega eynan.

   E persona masculino cu tabata den e boto, a baha di esaki pa asina purba na push’e bek den lama.  Pero algo a bay malo, y su curpa a bay dal den e chapaleta di e motor cu keto bay ta cendi.  Esaki a ocasiona heridanan severo na su curpa, cu eynan mes a cuminza sangra.

   Hendenan cu a mira esaki di leu, y pa ora cu nan a yega cerca a bin nota cu e homber ya no ta duna señal vital mas, y pesey awor ta pidi yudansa di Wardacosta.

   Mesora Wardacosta a bati alarma cerca e organizacion Citro di Corsou, cu ta e organizacion di boluntario cu ta coopera estrecho cu nan.  Nan a sali inmediatamente cu boto rumbo pa Fuik.  Fuikbaai ta situa apenas 3 kilometer pariba di Caracasbaai, unda hopi biaha Citro tin nan boto di rescate poni.

   Ora cu a yega, a bin haya e persona ya caba morto, y unico cu nan por a haci ta hisa su curpa y pone den e boto di Citro, y asina sali cu ne rumbo pa e waf di piscado na Caracasbaai, unda autoridad Policial a yega pa asina sigui atende cu e caso di desgracia fatal aki.

   E boto mes di e homber despues a sink na altura di e entrada di Fuikbaai, y Wardacosta a indica cu eybao e no ta forma ningun peligro pa nabegacion.