Docter Wilmer Salazar ta splica: - *Despues nan ta culpa e vacuna
ORANJESTAD (AAN) – Docter Wilmer Salazar, consehero Medico di Departamento di Salud Publico, a expresa pa prensa, durante e vacunaton 3.0, cu alomenos pueblo di Aruba tin e oportunidad di proteha, controla, mantene y podise elimina un virus cu ta prevenibel pa vacuna pa cual no tin tratamento pe.
“E persona cu ta haya infeccion di Covid y cu por haya complicacionnan en general, tin cu wak cu no tin tratamento pe”, dr. Salazar a indica.
Hende cu a contagia di Covid-19 y cu ta keda cas sin haci control, sin pasa e test y ta tuma remedi so, ta hopi dificil pa nan no haya complicacion.
“E comportacion di e virus Delta, mayoria di biaha tin diferente sintoma. Un persona por tin keintura so y tin covid. Un persona por tin un tiki calafrio y un tiki tos, e por tin covid. Un persona cu tin nanishi ta core, e por tin covid.
“Te aworaki, tur hende incluyendo asintomatico, por transmiti e infeccion facilmente. Aworaki no mester tin keintura, tosamento y dificultad pa hala rosea pa bisa cu tin covid. No! Awor tur hende por ta un factor di infeccion y di plamamento di covid. Si tin hende cu no ta tuma e vacuna pa cualkier motibo, mi ta respeta esey, pero e mester proteha su mes no solamente pa uza mondkapje, uza su shield, etc., sino cu mester wak unda e ta bay ora ta sali. Evita lugarnan cera cu hopi hende; laba frecuentemente bo man, evita bishita hendenan di edad of cu cierto complicacionnan. Esaki di berdad lo ta un stress pasobra nos kier alcanza un porcentahe mas grandi di proteccion, pa nos bisa cu nos por hala un tiki di rosea y cu no awor si, nos por habri un tiki nos espacio no solamente pa nos, pero pa nos comunidad henter”, dr. Salazar a subraya.
Dr. Salazar a señala cu uso di mondkapje no ta un garantia di 100% pero si ta un garantia. E distancia di 1.5 meter mester wordo mantene, mescos cu labamento di man.
Den un aglomeracion publico por ta mayoria di hende no tin sintoma respiratorio evidente. Pero un persona cu tin sintoma respiratorio y cu por tin covid, si e ta haya e vacuna e ora ey, e ta por nada! “Hopi biaha nan ta tira falta na e vacuna, un vez cu e ta wordo vacuna y tres of cinco dia despues e ta presenta keintura y ta pasa e test cu ta sali Covid positivo, ta pa motibo cu el a haya virus y a vacuna den su fase di incubacion. Corda cu e fase di incubacion di covid-19 ta dura dos siman, y den e fase ey no ta bay tin sintoma, sino despues, y esey tambe ta e otro punto importante. No warda te ora bo famia of amigonan tin covid: bo tin un solucion cu ta por nada y cu ta proteha bo”.
