Gobiernonan rond mundo ta na careda pa busca un solucion pa problemanan basico - Petroleo, plastic, jet, construccionnan costoso a bira problema internacional - Ora Lago a trece barconan ta entrada di otro tipo di malesa peligroso a registra
ORANJESTAD(AAN)- Na entrada di e ultimo siman completo di Augustus 2021, rond mundo problemanan ta continua y tur e problemanan aki ta mucho mas bieu cu Covid-19, cu ta e ultimo mundial pa cual tur pais na mundo mester haya un solucion pasobra el a tranca nan economia y nan bida completo.
Covid-19 a haci mucho mas cu mundo cu solamente menasa hende na un forma directo, manera cantidad di enfermedad a haci cu hende anteriormente. Covid-19 ta exigi hende para keto, bandona e mundo materialista cu a wordo forma durante Siglo 20 y subi caminda di realismo den planificacion.
Mundo mester realisa pakico el a keda pega na 2021 y no busca e problema solamente tras di Covid-19 pero tras di e factornan principal cu ta sconde tras di un mundo di fantasia total cu a wordo crea durante Siglo 20.
Dia 9 di Augustus 1945, algo dramatico a sosode na mundo. Segundo Guera Mundial a termina despues cu Little Boy y Fat Man a rementa na Hapon. Ta trata aki di e dos bomnan atomico cu a pone fin na Segundo Guera Mundial.
Guera a sigui pero a bira friu cu surgimento di Comunismo y un careda pa dominio mundial cu a surpasa e era colonial.
Den e desaroyo aki ta mira un explosion economico nobo, cu a cambia hende y a afecta mundo directamente.
E Milager di Hapon ta un ehempel di e forma con for di e restonan di e desaster cu e bom atomomico a laga atras, Hapon a surgi como un gigante economico. Un realidad, cu no a keda limita na Hapon
Petroleo a bira e oro nobo y Medio Oriente ta uno di e partinan di mundo cu a conoce rikesa enorme.
Poder y placa a uni den e segundo parti di Siglo 20, cu a crea un economia mundial completamente nobo.
Industrialnan a uni den conglomeracion. Agricultornan a bandona cunuconan. Turismo a introduci su mes. Plastic a reemplasa cristal.
Placa y mas placa mundo a genera y e nivel di bida a bini dilanti den e vivienda cu hende ta exigi pa e biba aden. Pa hende por biba e mester di television, e mester di internet, e mester di telefon, y asina por sigui.
E contacto humano a disparce mientras e balor di hende mes a disparce.
Prome cu Covid-19 ya mundo tabata bati alarma. Awe vacuna di Covid-19 ta wordo discuti,
Ora Lago a bini Aruba, cu tabata importa azeta pa refina, barconan mester a yega Aruba. Aki ta topa cu e mes peligro cu Aruba conoce awe, cu entrada for di exterior ta trece malesa.
Cu barconan e malesanan mas peligroso tabata relaciona cu bida sexual di e marineronan cu tabata yega Aruba y enfermedad venerico tabata e peligro cu mester a combati.
Esaki ta hiba nos awe na e punto mas serio.
Ora nos ta papia di historia di Aruba, nos ta sigui mira e historia politico. Nos mester cuminsa papia di realidadnan cu na cantidad di pais ta bini dilanti pa por recupera di e atake di e Coronavirus nobo.
Na cantidad di pais awe tin problema cu construccionnan caro y con ta mantene nan den un futuro cu mundo no tin e placa manera tabata e caso durante e epoca di oro di Siglo 20, ora nan a wordo construi.
Awe un mama no mester preocupa su mes kico e yiu ta come y con e ta drumi. E mama mester puntra su mes si e mucha tin un telefon pa comunica cu su amigonan dia y anochi.
E desaroyo di un mundo material, un mundo di fantasia durante Siglo 20 tabata un problema. Aruba a bandona su cunuconan. Aruba no a cuida su ambiente manera e tabata haci antes. Aruba a acepta exigencianan nobo di bida.
Awe ora nos ta papia di vacuna pa Covid-19, nos mester cuminsa realisa, cu tin hopi topico mas pa discuti riba cuido di salud, mientras antibiotica tambe ta bira menos resistente despues di tempo por ehempel. Comn ta bay atende esaki?
Pa cuminsa stop di presta tur atencion na con ta sigui cu fiestanan y regresa na e mentalidad Arubano di responsabilidad pa hende y pa e pais.
