ORANJESTAD (AAN) – FASE Uitkeuring ta un tipo di entrada cu ta cay bao e fuente di ingreso: “Entrada di pago periodico”. En principio mester paga Inkomstenbelasting riba dje.
Riba e tema aki Matutino DIARIO a entrevista señora Meverly Romano, Relacionista Publico di Departamento di Impuesto (DIMP), pasobra varios persona cu a haya FASE no ta compronde di con, ya cu nan ta corda cu den un conferencia di prensa di Gobierno, na inicio di e pandemia y cu a cuminza suministra e ayudo aki, e pregunta a surgi y gobierno a bisa cu lo no mester paga impuesto. No obstante, señora Romano a duna nos informacion hopi duidelijk al respecto, unda cu tambe mester paga prima di AZV, AOV/AWW. Diferente persona ta opina cu esaki ta inhusto.
“Tocante FASE, mi kier splica cu FASE ta un tipo di entrada cu den nos leynan di Inkomstenbelasting, e ta cay bao ‘entrada periodico’.
Nos ley di Inkomstenbelasting conoce diferente fuente di entrada. Nos tin un fuente cu yama ‘entrada di empleo’, nos tin entrada di propiedad inmovil, y un di e tipo di fuentenan cu ta existi di Inkomstenbelasting ta ‘entrada di pago periodico’. Y e ‘FASE uitkeuring’ ta cay bao e entrada aki. Esey ta nifica cu e personanan cu a ricibi e pago di FASE, lo mester declara e entrada aki, den nan formulario di Inkomstenbelasting di aña 2020. Nan ta declara loke realmente nan a ricibi na entrada durante 2020.
“ Nos a compronde cu gobierno a cuminza paga FASE na April. Esey ta nifica cu si un persona a haya Fase desde April te cu December, e lo a haya nuebe luna di entrada e ora ey, y esey ta haci cu e ta yega na un total di 8.750 florin di April te cu December”, señora Meverly Romano a declara.
Romano a sigui splica cu, logicamente, ora di yena e declaracion lo mester yena tambe e salario cu e persona tabata tin di Januari te cu Maart. Dus, Inkomstenbelasting ta cubri e entrada total cu e persona a ricibi desde Januari te cu December.
“Awo, nos ley di Inkomstenbelasting tambe conoce un suma riba cual no ta paga belasting riba dje. Y e suma akinan ta tur entrada te cu 28.861 florin pa aña. Pa esnan cu ta gana mas halto cu e suma aki, pa aña, e ora ey ta cuminza paga Inkomstenbelasting.
“ Hopi bez, e personanan cu a ricibi entrada di Fase nan no ta yega 28.861 florin pa aña. Esey ta nifica cu apesar cu nan tin cu declare y cu tin un entrada cu ta conta pa Inkomstenbelasting, tanten cu nan ta keda te final di aña bao di 28.861 florin, nos no lo cobra nan Inkomstenbelasting. Kiermen pa e belasting aki, e suma lo ta nihil.
