Rapportnan cu a demostra abuso di placa di Pueblo ta muri den cashi - *Supervision Hulandes mester wordo complementa cu ley ahusta - *Ley penal mester impone integridad cu a muri den abuso gubernamental
ORANJESTAD (AAN) — Ta exactamente tres aña pasa, cu DIARIO a duna inicio na e columna “Analisis” cu a bira uno di e produccionnan directamente mara na periodismo investigativo.
DIARIO a bay para na entrada di e fuentenan cu ta productor mayor di posibilidad pa mal gobernacion, abuso di pueblo, kiebra di ley y corupcion.
Pa medio di “Analisis” entre otro, DIARIO a entrega Aruba prueba di e fantasia di Citgo, pero tambe di e abuso di 1.6 Miljard Florin di Pueblo.
Cu asistencia di expertonan riba tereno local y internacional DIARIO a rementa contenido di rapportnan y asuntonan cu a wordo kita for di bista di Pueblo sigur durante e periodo di 2009 pa 2017, cu ta keda segun tur rapport e periodo di gobernacion mas sushi, mas abusador, cu Aruba a yega di conoce y cu a manca futuro di Aruba.
Ta hustamente e hecho cu futuro di Aruba a wordo destrui durante e periodo di 2009 pa 2017, ta haci cu awe Aruba mester permiti supervision Hulandes pa tin placa pa npo hoga den e lama bruto cu Covid-19 a haci mas peligroso.
Manera nos a trece dilanti ayera, Aruba mester di e asistencia tecnico di Hulanda pa sobrevivi den un futuro sumamente dificil mundialmente. Nos mester acepta cu supervision no ta un palabra cu mundo politico stima, pasobra e ta stroba politiconan di haci y deshaci manera nan kier manera a keda proba.
DIARIO no por mira interes politico, pero mester mira interes di Pueblo y den esaki ta completamente di acuerdo cu e logro entre Gobierno Wever-Croes y Hulanda pa loke ta trata e acuerdo pa supervision.
Pero Gobierno Wever-Croes 2, ta asumi responsabilidad pa un temporada nobo di gobernacion, cu un necesidad grandi.
Integridad ta e palabra central den e acuerdo di gobernacion entre MEP y RAIZ. Integridad cu tur e casonan pa corupcion den Corte contra gobernantenan, a demostra di tabata ausente den loke segun acusacionnan tabata ausente den casonan cu Ministerio Publico a persigui gobernantenan di Gobierno Mike Eman.
Den pasado e Caso Fondo Desaroyo Nobo cu a resulta den castigo di ministronan di Gobierno Henny Eman ya a papia di corupcion den administracion di Aruba, mientras cu den man di Ministerio Publico ainda tin e rapport di Refineria di Aruba cu ta pone lana di ciudadanonan integro lanta y den cual sigur Mike de Meza entre otro lo mester splica kico el a haci den e aventura malogra di Citgo.
Ta keda un hecho cu un rapport manera “Bo Aruba” den cual Algemene Rekenkamer Aruba a duna prueba kico Mike Eman y Benny Sevinger a haci cu 1.6 Miljard Florin di Aruba, a muri den lachi caminda na 2017 oficialmente Benny a sconde e documento pa Pueblo no mira prome cu eleccuin 2017.
E rapport a wordo traha dor di Algemene Rekenkamer Aruba, cu ta e instancia cu mester guia Parlamento y mester indica si placa di Aruba a wordo bon gasta of si gobernantenan a kibra leynan y sigur e Ley di Contabilidad cu ta bisa con ta atende cu placa di Pueblo.
DIARIO a bini cu prueba con e Acuerdo di Citgo a wordo firma contra Ley di Contabilidad. DIARIO a presenta prueba di Algemene Rekenkamer Aruba mes con Ley di Contabilidad a wordo kibra dor di Mike Eman y Benny Sevinger segun e rapport Bo Aruba.
Esaki ta haci cu awe ora ta papia di integridad, DIARIO ta bolbe na su punto di bista y ta pidi Gobierno Wever-Croes 2 pa impone integridad politico dor di introduci castigo di prison directo pa abusonan manera a tuma lugar cu e proyectonan di Bo Aruba, cu tin mes base di mal administracion y abuso di placa cu Caso Fondo Desaroyo Nobo San Nicolas den cual investigacion a revela corupcion a base di e mal maneho cu a permiti corupcion segun Huez.
E siman nobo ta trece Gobierno Wever-Croes 2 mas cerca. E siman nobo ta habri cu Aruba mara na supervision di Hulanda y asina recuperacion di e base mas importante di gobernacion cu ta integridad.
Awe e Leynan cu ta regla e control di uzo di placa di Pueblo dor di Algemene Rekenkamer Aruba mester wordo reennforsa cu e posibilidad pa automaticamente e investigacionnan di Algemene Rekenkamer Aruba wordo studia tambe pa Ministerio Publico pa determina si tabata tin actonan cu ta exigi persecucion penal pa abuso di placa di Pueblo, cu na nos concepto mester a sosode sigur a base di e rapport di ARA, Bo Aruba, e saco di Sinterklaas Mike Eman y Benny Sevinger.
