Personal di Bureau Traimerdia ta obtene nan vaste dienst despues di dies aña

Minister Rocco Tjon:

ORANJESTAD (AAN): Dialuna mainta, Minister di Husticia y Asuntonan Social sr. Rocco Tjon, a sinta cu e ekipo di Bureau Trai Merdia (BTM), pa asina comparti cu nan e grato noticia cu despues di alrededor di dies aña, a percura pa esnan cu ta riba un contract por obtene nan vaste dienst.

            Manera ta conoci e ekipo di BTM ta haciendo un tremendo trabou, pa na final di dia garantisa siguridad di nos muchanan. Nan ta percura pa vang op e muchanan despues di scol y guia nan pa asina nan no ta nan so na cas of riba caya. Pues, un trabou sumamente importante pa e cadena social y consecuentemente e cadena hudicial.

            Un di e puntonan cu a elabora riba dje ta e convertimento di nan empleo. E grupo aki specificamente ta riba contract, y algun di nan tin mas di dies aña riba contract. Danki na e trabounan di DRH, awe a notifica nan cu e conseho a drenta pa cambia nan “dienstverband”, pues nan lo drenta den vaste dienst. Esaki pa nan mes ta hopi importante tambe, y Ministerio di Husticia y Asuntonan social ta satisfecho cu e logro aki pa cu BTM.

            Banda di esaki, BTM a cumpli 28 aña di existencia, pues un dia di double celebracion. Minister Tjon a manda palabranan di pabien y danki na tur e profesionalnan pa e trabou grandi cu nan ta eherce pa nos muchanan.