ORANJESTAD (AAN): Aruba ta keto bay den pandemia, y e isla ta purbando lo mas posible pa evita cu e cantidad di camanan den unidad di Intensive Care ta wordo ocupa.
Pesey Aruba a bin cu Toque de Queda, pa evita cu accidentenan grave cu ta socede madruga, ta pone extra peso riba Hospital di Aruba.
Pesey un biaha mas, den cuadro di Siman di Ambulance, e Operations Manager Ambulancezorg di ImSan, esta Liberato Hoek, ta haci un suplica na chauffeurnan pa coopera cu Aruba, y tambe coopera cu Servicio di Ambulance.
Nan ta pidi chauffeurnan pa ta hopi cauteloso den trafico, ora cu Ambulans ta yega cerca su sirena y luz cendi.
Segun Hoek, tambe esnan di Ambulans a nota cu durante e peak di contagio di Covid-19 na Aruba, cu e cantidad di accident a cay bastante. Pero ultimo tempo un biaha mas ta notando aumento den cantidad di accident riba e isla.
“Por fabor den trafico, tuma medida di precaucion, y bisti bo faha di seguridad, mantene bo mes na e limite di velocidad,” Hoek a bisa den un intento pa chauffeurnan ta mas conciente ora di core riba caya.
Pero su peticion no ta djis dirigi riba chauffeurnan, e ta bay riba publico en general. Si acaso bo ta sufri di un malesa cronico, corda tuma bo remedi na tempo, y sigui tur e reglanan cu Docter ta dunabo.
Hoek ta hopi agradecido pa e atencion cu nan a bin ta ricibi durante Siman di Ambulance, y e aprecio pa e empuhe y bon trabao cu nan ta haciendo. E sosten di pueblo ta hopi aprecia pa e personal di Ambulance.
