Ministro di Transporte a confirma
- Awor ta delibera riba paso legal pa kizas revoca permiso di Taxi tambe
ORANJESTAD (AAN): Informacion nobo ta mustra cu autoridadnan hudicial a keda cla cu investigacion di e caso serio cu a presenta dos siman pasa, esta Diasabra dia 30 di Maart riba tereno di Taxi Parking, specificamente na e ‘Taxi Rest-Area’ na Aeropuerto Internacional Reina Beatrix. A bin sali na cla cu dos Taxista adulto a busca guera cu otro, debi na supuesto ‘Triangulo di Amor’ den cual un dama hoben di 27 aña di edad ta envolvi.
Na e Taxi Rest-Area na Aeropuerto, tin un gazebo special pa Taxistanan por relaha wardando nan turno, cu asiento y mesa, caminda tin biaha ta hunga Domino tambe of djis chill y combersa cu otro.
Un Taxista femenino nobo, kende ta trahando como ‘Hulpchauffeur’, a cuminsa core haci trabao alrededor di aña pasa y aparentemente a cuminsa envolvi su mes romanticamente cu un Taxista. Pero recien aparentemente e Hulpchauffeur a haci cambio y a start romance cu un otro Taxista.
Aki ta unda conflicto a start! Aunke uno di nan esposa na cas, un guera a start entre e dos Taxistanan aki. E conflicto a escala riba Diasabra atardi, ora cu chauffeur W.H. di TX-202 (un Toyota Prado Landcruiser) a yega furioso bao di e gazebo na Aeropuerto, y el a bay unda chauffeur L.C. di TX-442 ta sinta. Den forma sopresivo, el a zwaai su man y dal chauffeur di TX-442 cu bofta den su cara. Tin video ta indica cu Taxista TX-202 (un Honda Odysey minivan) tambe tin obheto skerpi den man. E taxista TX-442 a bira furioso cu e bofta aki, a bay na su auto y busca un obheto skerpi y cu esaki el a ataca TX-202 y lage herida.
Polisnan a wordo yama pa 3:55 pm, y Central di Polis mesora a manda patruyanan di Playa, como tambe unidad K9, y Grenspolitie rumbo pa eynan. Polis a yega y a nota cu Grenspolitie tey caba ta acumulando informacion. A base di esaki, Polisnan a aresta e Taxista di inicial L.C. di TX-442. E obheto skerpi tambe a wordo confisca. E taxista herida di inicial W.H. a wordo hiba Hospital cu Ambulans.
Rij-vergunning a wordo revoca: Awor cu e investigacion a keda cla y kizas ta warda un fecha pa e caso penal yega den Corte, e asunto serio aki a wordo investiga y analisa tambe pa Departamento di Transporte Publico (DTP), y Ministro di Transporte.
Den un entrevista cu Ministro Ursell Arends encarga cu DTP, el a confirma cu durante fin di siman ultimo, ambos Taxista den e caso aki, esta di inicial L.C. como tambe inicial W.H. a ricibi notificacion cu nan Rijvergunning a wordo revoca. “Unavez cu nan rijvergunning a wordo revoca, esey nifica tambe cu nan no por fungi como Taxista,” e titular di Transporte a indica.
Aworaki e deliberacionnan ta sigui cu DTP pa mira con ta sigui procede, y con ta bay agrega reglanan adicional pa ora tipo di casonan aki socede, y con ta bay mitiga nan tambe. El a bisa cu no por generalisa cu e comportacion di dos taxistanan aki ta igual pa tur otro 463 Taxista riba e isla. Pero e ta kere cu tin hopi reclamo ta drenta di e actitud y comportamentonan aki, y e momento a yega pa para keto, pa asina hunto cu tur Taxistanan bay delinea con ta bay sigui padilanti.
Ministro a bisa cu e si ta kere den dialogo, y den su funcion como Ministro e tabatin dialogo constant cu representante di gruponan di Taxista, y nan mes ta mira y nan mes ta condena e tipo di actitud aki. Pesey ta enfatisa cu Gobierno no ta bay generalisa tur Taxista pa loke e duo aki a haci na Aeropuerto. Pero si ta hecho cu sancionnan a wordo tuma caba. E prome ta pa revoca e rijvergunning, y awor ta wardando pa mira via e pasonan legal, si acaso mester yega asina leu tambe pa revoca e Taxi-vergunning.
