Alarma di DIARIO pa instabilidad prijs di petroleo ta keda vigente
*Suspenso mundial creciente na situacion explosivo Medio Oriente
*Prijs di gasolin a sigui subi ayera mescos cu crudo di OPEC
ORANJESTAD (AAN) — Ayera atrobe e prueba a wordo duna cu DIARIO a prepara su lectornan na forma corecto pa momentonan di instabilidad grandi cu ta afecta sectornan mundial importante.
Ora papia di petroleo y e efectonan cu e tin ariba desaroyo mundial, hopi bez ta papia di factornan conoci manera guera, cu na e momentonan aki ta presente pero ta uni nan mes tambe na e preocupacion grandi den seno di e sector di Inteligencia Artificial, cu awor ta expresa preocupacion pa e forma cu e ta wordo afecta.
DIARIO a prepara Aruba pa 2024 como e aña di culminacion di cambio mundial, den cual entre otro e desaroyonan riba tereno di Inteligencia Artificial, a haya tur atencion hasta prome cu e Pandemia Covid-19 a entrega mundo prueba di e desaroyo tecnologico cu a permiti intercambio di informacion, asisti mundo den e confrontacion cu e pandemia.
Na 2023, por a tuma nota con tur sector a bini dilanti pa splica e resultadonan di e desaroyonan tecnologico nobo riba tur tereno.
A parce cu e problemanan di petroleo, lo a deshaci di e importancia pa sigui vigila e desaroyonan den mundo di Inteligencia Artificial, cu awor ta admiti su dependencia di combustibel, cu e mester pa por funciona.
Sector di Inteligencia Artificial a indica loke tambe DIARIO a presenta como preocupacion mundial, cu no por stroba progreso en espera di e momento cu a deshaci completamente di petroleo y mundo ta depende solamente di energia limpi.
For di seno di e sector di Inteligencia Artificial, uno di e puntonan mas importante cu a bini dilanti durante e Conferencia di Clima na final di 2023, awor ta indica cu Inteligencia Artificial, teniendo cuenta cu e traspaso pa energia limpi, no por depende solamente di energia limpi pa nan alcansa nan metanan den nan planificacion.
E exigencia mundial pa energia ta crece cu un velocidad enorme hustamente pa motibo di e posibilidadnan nobo cu Inteligencia Artificial ta ofrece.
Den e cuadro aki e necesidad di trahador cualifica ta expresa su mes mas y mas den un economia creciente, a pesar di tur e problemanan cu ta nace riba otro tereno.
E necesidadnan cu inovacion industrial y comercial mundial ta crea, ayera hasta a kita atencion for di e momentonan di mas suspenso den e confrontacion na Gaza, caminda na ciere di e edicion aki, tabata tin tur indicacion cu no por papia di un acuerdo pa pone un fin na e conflicto.
Un entendimento entre e dos partidonan opositor, no a wordo logra y mas bien te na ciere di DIARIO, e pensamentonan tabata cu ambos partido tabata prepara nan mes pa ofensivonan nobo.
Prijs di petroleo, sinembargo, no ta depende solamente di e problema na Medio Oriente, aunke ayera ora hostilidad a baha, por a nota tambe cu algun productor di petroleo a baha nan prijs. Sinembargo, e prijs di entre otro paisnan di OPEC a sigui subi mientras cu e companianan di Merca y Inglatera originalmente a baha nan prijs, cu despues a bolbe subi.
E prijs di petroleo no ta depende solamente di e violencia na Medio Oriente, pero tambe di e produccion di azeta y e reservanan mundial di petroleo na un mundo cu ta admiti cu salida di petroleo mester di mihor planificacion y mas dialogo.
Manera ya a wordo bida, otro sectornan cu ta wordo afecta pa e instabilidad mundial, tambe a cuminsa presenta nan verison manera ta sigur e caso cu e sector di Inteligencia Artificial, responsabel pa e transformacion mas importante di economia.
Inversionnan enorme a wordo haci rond mundo y awor ta pendiente di e sector di energia, cu mester entrega nan e base pa produccion.
Informantenan clave a revela ayera na DIARIO, cu awor ta wordo demostra cu e clausura di e Conferencia mundial di Clima na final di 2023, mester a dedica mas atencion na e realidad cu mundo ta depende di petroleo.
DIARIO ta den contacto continuo cu informantenan internacional sigur riba tereno di e resultadonan cu e desaroyonan lo tin pa Inteligencia Artificial, cu no por dal un paso atras ni keda mas en espera a base di loke ta pasa den e campo energetico mundial.
Un cos ta sigur, mundo ta den un epoca di inversionnan enorme cu tambe DIARIO a anuncia y e cambionan grandi pa cual rond mundo sectornan comercial y laboral, mester ta prepara!
