Ivo Valdes di OPPA:
ORANJESTAD (AAN): Algun tempo pasa, Organizacion di Pensionadonan Publico Arubano (OPPA) a manda un carta pa Gobierno, debi cu ainda pais Aruba debe e pensionadonan, dos aña di ‘Gelijkbedrag’, esta mitar. Pues tin un Gelijkbedrag completo cu tin di haya di e dos añanan cu a kort-in.
Esey ta loke Ivo Valdes, kende ta dirigi Organizacion OPPA a indica, y el a agrega cu te ainda e no a haya contesta di Gobierno.
Siman venidero, OPPA tin pensa di bolbe manda carta pa check kico Gobierno ta contesta of no.
E president di OPPA a elabora tambe cu pensionadonan a ricibi solamente 250 Florin extra riba e pensioen di AOV, y manera nan ta bisa, cu priminti ta mas cu debe. Costo di bida aworaki ta enorme pa pensionadonan, y productonan den Supermarket ta impagabel. Pesey bo ta haya hende ta busca comestibel di mas economico, como cu esey ta loke nan por paga. Na opinion di Valdes, tur esey tin di cambia.
E problema cu tin ta cu den Gobierno mes ainda nan no por keda cla cu nan asuntonan, y pueblo no sa ki ora ta yega un fin na esey. Ohala cu Gobierno por fix nan asunto interno pa caba, pa asina por atende cu asuntonan di pueblo mas rapido posibel y duna prioridad halto.
“Pasobra nos grandinan no por warda mas te ki ora bo kier duna nan loke nan mester, pasobra ora ya nan a bay sosega, ya ta laat,” Ivo Valdes a finalisa bisando.
