Parlamentario di PPA
- Un panorama preocupante cu no tin bodycam ni training cu arma
ORANJESTAD (AAN): E siman aki durante e vragenuur intenso di Parlamento, Otmar Oduber, di fraccion PPA, a expresa su preocupacion riba varios deficiencia den funcionamento di nos Cuerpo Policial, sistema di husticia y cuido di orden publico. Di bodycam, training cu arma, te sesion di psicologo den Cuerpo Policial Aruba, Otmar a pinta un panorama preocupante.
Tres Presupuesto pero 0 bodycam: Segun Otmar, a pesar di promesa y aproba 3 presupuesto pa implementa bodycam pa polis. Ultimo mes fraccion di PPA a presenta un mocion den presupuesto pa pone placa pa e cos aki, pero e parlamentarionan di coalicion a vota contra, ya cu segun nan ya esaki ta poni den Plan di Gobierno y awor e minister en cuestion ta indica cu mester di fondo. “Bodycam ta un herment importante pa proteha tanto polis como pueblo. Ta keda hunga politica cu e topico aki y comunidad ta esun cu ta bira victima,” el a vocifera.
E confirmacion di Minister Dowers cu no tin niun proyecto andando, y cu e sa si, ta cu tin algun camara cu a cumpra, pero nada mas y cu Dashcam ta algo cu, segun minister Dowers, e por implementa mañan mes, pero mester di fondo. Otmar ta haya cu henter e situacion aki di bodycam y dashcam uno masha lamentabel. Specialmente mirando con e mundo moderno cu nos ta bibando den dje, unda cu un bodycam ta hasta un proteccion pa e agente policial y ta duna siguridad na nos comunidad. Pues nos ta den overtime cu e asunto di bodycam.
Deficiencia di training di tiramento cu arma: Un otro punto cu Otmar a highlight ta, su preocupacion cu unabes un polis caba su estudio como polis na Scol di Polis, parce cu su formacion a caba y no ta sigui haya training continuo con ta anda cu arma. Esaki sigur ta algo fundamental cu falta y segun e minister, nan lo bay traha riba dje tambe.
Evaluacion Psicologico y Drugtest: E falta di sosten y sesion psicologico y implementacion di drugtests ta dos otro punto di preocupacion cu Otmar Oduber a subraya y cu mester haya su atencion. Minister Dowers a haya esaki un bon idea, mientras cu esaki tabata un mocion cu e minister e tempo ey mes a firma den pasado.
E bon di e asuntonan aki, specialmente esun di test di droga ta cu, Sindicato di Polis (SPA) mes ta para tras di dje pa introducie mas pronto cu ta posibel. “Mi a hasta indica cu ta bon pa cuminsa cu nos mes, pues unda tur cu tin un funcion di autoridad peculiar den nos comunidad, tambe haci un test di droga,” Oduber a enfatisa.
Oduber ta spera cu den e presupuesto supletorio, minister Dowers presenta tur esakinan bek y cu tur parlamentario bay di acuerdo cu e mocionnan un biaha mas y pa nos cuminsa realisa cu accion y no solamente cu palabra. Husticia no ta un luho, e ta un derecho.
{gallery}Otmar Oduber ta exigi accion y no solamente promesa riba bodycam, formacion y husticia{/gallery}
