Prome Minister demisionario Evelyn Wever-Croes ta reitera:
ORANJESTAD (AAN) – Prome Minister Demisionario, mr. Evelyn Wever-Croes, a hiba palabra pa clausura conferencia di prensa, cu a tuma lugar na Departamento di Impuesto (DIM).
E dignatario a recapitula locual a wordo treci dilanti door di Directora di Impuesto Luanne Gomes-Pieters y Minister demisionario Xiomara Maduro.
E dignatario a señala cu e cambionan di impuesto cu ta wordo proponi lo drenta na vigor inmediatamente, cu forza retroactivo te cu 1 di Januari 2025, awo cu e Decreto ta wordo publica. Esaki ta bay nifica cu un cambio considerabel pa e cantidad di clientenan cu tur aña ta paga loonbelasting riba nan salario y inkomstenbelasting riba nan entrada.
“Tempo cu nos a drenta den Gobierno, tabata tin como 40 mil persona cu mester a paga e belastingnan aki tur aña, e inkomstenbelasting. Awo cu e cambionan aki na 2025, e cantidad di personanan cu ta sigui paga e belasting aki ta apenas 12 mil. Pues nos a trece un alivio den e peso di impuesto, pero tambe den e trabaonan cu mester wordo haci pa yena e formularionan cada aña, di un total di 28 mil persona cu no tin nodi di yena e formulario mas y no tin nodi di paga e belasting aki mas”, e ex-dignatario a bisa.
El a subraya cu mas interesado ta e caso di e pensionadonan. El a menciona cu awo cu e cambio aki drenta na vigor, di 19 mil pensionado cu ta biba na Aruba, solamente dos mil y pico lo sigui paga e impuesto aki. Ta trata aki di pensionadonan cu tin mas entrada, pues no un ni dos pensioen, pero mas fuente di entrada y cu lo sigui e belasting paga riba e diferente fuentenan di entrada.
“ Pero nan tarifa tambe ta baha manera a wordo splica, door di directora di impuesto y di minister di finanzas. Pues, esaki nos ta considera nos compromiso na pensionadonan di elimina e belasting riba e prome y e di dos pension, como cumpli na un forma responsabel. Esaki ta algo cu nos a desea di haci for di prome dia cu nos a drenta den gobernacion, pero e situacion financiero no a duna. Nos mester a estabiliza e pais financieramente, mester a rescata e pais di e pandemia y despues bolbe estabilis’e despues di e pandemia y crea espacio financiero. Y awe si, por duna e alivio aki na nos pensionadonan tambe”, Premier Wever-Croes a reitera.
Seguidamente, el a gradici e profesionalnan di Departamento di Impuesto cu desde e prome dia a traha riba tur e retonan y e proyectonan aki na un forma responsabel, haciendo bon analisis di data, studiando e impacto cu cada decision por ta. “Asina nos a goberna nos pais y nos por a haci esey danki na e hecho cu nos profesionalnan tabata dispone di informacion, nan conoce nan materia y nan profesionalismo ta loke a guia tur e discusionnan aki pa nos ta asina leu. Pero esaki lo no tabata posibel si no tabata pa e vision di e Minister di Finanzas, su determinacion, su caracter, su curason pa por trece e alivio aki, y pesey mi ta gradici minister di finanzas pa por a logra esaki”, Minister Presidente a expresa.
