Opinion publico
ORANJESTAD (AAN): Un ciudadano tiki desapunta, a splica cu riba Dialuna 6 di Januari 2025 el a bay Departamento di Impuesto relaciona cu e plach'i number pa su auto.
El a haci esey, debi cu el a yama na diferente ocasion e numbernan cu e Directora di DIMP mes a bisa, pa yama pa asina haya un cita pa busca plachi. Como cu e no tabata wordo atendi na telefon, riba Dialuna mainta el a bay personal mes na oficina principal di DIMP pa haci cita.
Pa haci cita mester bay na e edificio principal! No na e edificio unda ta entrega plachi. Pero e biaha aki esnan na Balie no por yuda, y nan a bis’e pa bay pa e vestibulo sea 23 of 24 pa wordo atendi.
Casi bo no ta haya un stoel pa sinta di hende cu tabata tin den e lugar. Bo no ta haya number pa sa ki ora ta bo beurt y esey ta pone cu a bira un chaos un rato eyden.
Despues di a sinta casi dos ora (ya cu el a bay di 8’or di mainta), el a haya beurt te banda 10’or. Pues el a worde atendi y a worde informa cu nan a pone su cita pa e busca su plach'i number te dia 14 di April.
E ciudadano ta puntra, con por ta cu Impuesto ta keda roga pa publico paga e Nummerplaat belasting tempran (e mes a paga di dia 10 December), y awor cu e ta bay busc’e nan ta bisa bo cu bo ta hay'e te dia 14 April. Con ta haci ora Polis controla? Y pakico no por duna e number di plachi mesora ya ta evita cu mester haci dos biaha pa e lugar ey.
