DIARIO prome cu entrada di 2020 a prepara Aruba pa tur cambio na caminda - *13 di Mei 1968 control di nacemento a bira un derecho humano universal - *Ciencia a produci bida mas largo y menos hoben pa carga gasto di pensioen
ORANJESTAD (AAN) — Entrada di Covid-19 solamente a produci un aspecto mas na e monton di problema cu cambionan di comunidad mundial durante Siglo 20 a produci y pa cual for di 2019 DIARIO a adverti na entrada di e decada nobo.
E avance enorme di ciencia na Siglo 20 finalmente a resulta den clasificacionnan di gruponan di edad, cu cual mundo actual moderno hasta mester tene cuenta ora e kier bende un producto.
Despues di Segunda Guera Mundial, bida a cambia drasticamente. E prome elemento sigur tabata e avance cientifico cu a logra y cu a duna un dimension nobo na mundo ora e bom atomico a rementa.
Un mundo nobo a nace den laboratorionan di investigacion, cu descubrimentonan nobo y ciencia cu awe a bira hasta problema di concenshi pa humanidad.
Den e epoca di destruccion mundial, bienestar material a florece. Despues di Segunda Guera Mundial, mundo a cera conocu cu e Epoca di Oro, e Golden Age, den cual bienestar financiero a entrega fortuna na e cantidad di trahadonan cu a bandona campo pa bay traha den e mundo industrialisa.
Den e situacion aki famianan tabata tin mas placa y mas yiu a cuminsa nace y a haya e nomber di Baby Boomers, e generacion cu a marca desaroyonan di Siglo 20, cu introduccion di un estilo nobo, rechaso di modelonan bieu y cambio den comportacion di hende cu a cuminsa tene duro na loke a wordo yama “derecho humano” riba cual mundo tabata dicidi den Nacionnan Uni.
Ta den e seno di Nacionnan Uni a cuminsa atende cu e problemanan cu a cuminsa presenta na decada 70, ora tur hende a haya derecho y hende muhe tambe a cuminsa participa activamente den comunidad y maternidad ya no tabata wordo interpreta como regalo.
Mundo a descubri formanan pa evita nacemento di yiu.
Sterilisa tabata un forma pa evita yiu bini na mundo y prevencion di maternidad a bira un derecho mundial dia 13 di Mei 1968.
Nacionnan Uni na varios occasion a wordo acusa di tabata yuda paisnan na entre otro Asia y America Latino pa forsa muhenan sterilisa nan mes pa asina mas yiu no nace.
Resultado tabata cu mundo a conoce un ehercito di mucha cu a nace imediatamente despues di Segunda Guera Mundial, pero cu a introduci metodonan pa sigui permiti muchanan di nace na cantidad.
Na mes momento ciencia medico a duna hende instrumentonan pa alcansa un edad mas halto loke ta haci cu awe e grupo grandi di Baby Boomers cu a yega edad di pensioen di biehes, ainda ta activo den comunidad y a costumbra cu un mihor bida cu antes tabata e caso.
Ya no ta asunto pa entrega madushi un cama pa e bira bieu, pero awor madushi y padushi mes tin nan bida y ta bira un grupo mas grandi y hasta creciente pa cual e grupo mas hoben mester percura den e sistema di fondonan social cu mundo a introduci den socialisacion di bida cu a tuma luga tambe durante Siglo 20.
Awe mundo mester tuma medida pasobra mundo no por sigui paga.
Subi edad di pensioen di biehes ta necesario mundialmente pa fondonan di pensioen publico por sigui existi. Na mes momento edad mas halto tambe a cambia y por mira cu hopi pensionado ta duna prueba cu nan por keda na trabou un rato mas.
Algo cu riba su mes tambe ta crea otro problema pasobra den un mundo automatisa, hoben y grandi ta topa cu otro den fila pa busca trabou.
Den Covid-19 solucion mester wordo haya pa e situacion cu Siglo 20 a crea. Un situacion cu mester atende cu inteligencia y a base di realidad, sigur si tene na consideracion cu e fondo di pensioen di biehes ta sufri den tempo di pandemia, manera Covid-19 a demostra pero tambe den crisisnan financiero cu mal gobernacion por produci y ta afecta e mercado laboral cu ta bira menos favorabel pa pago den e fondo di pensioen di biehes.
