ORANJESTAD (AAN): E cantante internacional Taylor Swift a caba di tene su Concert Tour cu a produci ganashi record.
Y awor e ta preparando pa conkista teatronan di cine tambe.
E pelicula ‘Taylor Swift: The Eras Tour’ a cuminza pasa den su estreno exclusivo pa invitadonan riba Diaranson siman pasa caba na Los Angeles, y algun sala cu a presenta esaki pa publico. Pero e pelicula mes oficialmente lo cuminza pasa na October 2025 venidero.
Pero ya di awor caba na Augustus, el a bende mas di 100 miyon Dollar den hendenan cu a cuminza cumpra ticket na 8.500 cinema rond mundo. Na Merca so e lo por produci 107 miyon Dollar na final di e prome weekend. Taylor Swift lo bay ricibi como 60% di esey.
Na e premiere di siman pasa Diaranson, tabatey presente Taylor Swift hunto cu Beyoncé, Maren Morris, Hayley Kiyoko, Adam Sandler, Simu Liu, Mariska Hargitay, Fortune Feimster, Julia Garner, Victoria Garrick Browne, y Flavor Flav.
Mirando cu e ta pasando caba na varios teatro na Merca, DIARIO a ricibi yamada di personanan cu a puntra si acaso sa ki tempo e pelicula aki lo pasa den salanan di cine na Aruba. Segun acuerdonan di e release di e pelicula aki pa mercado internacional, na Aruba e lo bay cuminza pasa riba Dialuna 13 di October 2025. E number “13” ta uno di suerte pa Taylor Swift, y e mes a escoge pa esey ta e fecha di comienso oficial.
Pues dia 13 di October e lo cuminza pasa na Aruba, tambe Curaçao, Hulanda, Colombia, Costa Rica, Jamaica, Bermuda, Puerto Rico, St. Maarten, Venezuela, pa un total di 100 pais.
Na Brasil cu Hong Kong, India, Indonesia, Singapore, Zuid Korea, Taiwan, etc., e lo cuminza pasa te dia 3 di November 2025.
No ta conoci si acaso na Aruba ya por cuminza cumpra ticket pa e pelicula.
